قىرعىزستانداعى پرەزيدەنت يناۋگۋراتسياسىنا شەتەل باسشىلارى شاقىرىلمايدى

استانا. قازاقپارات - قىرعىزستاندا پرەزيدەنت سايلاۋىندا جەڭىسكە جەتكەن سوورونباي جيەنبەكوۆتىڭ يناۋگۋراتسياسىنا شەتەلدىك مەملەكەت باسشىلارى شاقىرىلمايدى. بۇل جونىندە پرەزيدەنت اكىمشىلىگىنىڭ جەتەكشىسى الماز ۋسەنوۆ مالىمدەدى.

 ونىڭ سوزىنشە، بۇل شەشىم «الەمدىك تاجىريبەنى ەسكەرە وتىرىپ» قابىلدانعان. ءبىراق ول سالتاناتتى شاراعا قىرعىزستانداعى بارلىق ەلدەردىڭ ەلشىلەرى شاقىرىلاتىنىن اتاپ ءوتتى.

سوورونباي جيەنبەكوۆتىڭ يناۋگۋراتسياسى 24 - قاراشادا وتەدى. ول 15 - قازاندا وتكەن پرەزيدەنت سايلاۋىندا سايلاۋشىلاردىڭ 54 پايىز داۋىسىن جيناپ، جەڭىسكە جەتتى.

قىرعىزستاننىڭ ءىس باسىنداعى پرەزيدەنتى المازبەك اتامبايەۆتىڭ وكىلەتتىگى 1 - جەلتوقساندا اياقتالادى. 15 - قاراشادا اتامبايەۆ پرەزيدەنت رەتىندە سوڭعى باسپا ءسوز ءماسليحاتىن وتكىزۋدى جوسپارلاپ وتىر.

azattyq.org