شەنەۋنىكتەردەن ۇرلانعان دجيپ ساتىپ العان قاراعاندى تۇرعىنى سوتقا شاعىمدانباق

قاراعاندى. قازاقپارات - قاراعاندى قالالىق سوتى استانالىق شەنەۋنىكتەردەن ەلەكتروندى مەملەكەتتىك ساتىپ الۋ ارقىلى ساتىپ الىنعان، ۇرلانعان دجيپ كولىگىنە قاتىستى ءىستى قاراۋدان باس تارتتى.

ءسويتىپ، ءىستى استانا قالاسىنىڭ سارى ارقا اۋداندىق سوتىنا جولدادى، دەپ حابارلايدى قازاقپارات.

قىلمىستىق ءىستىڭ ماتەريالدارى بويىنشا، وسىدان بىرنەشە جىل بۇرىن اقتوبەدە ۇرلانعان جول تالعامايتىن 2006 -جىلعى Toyota Land Cruiser Prado كولىگى رەسمي تۇردە ەلەكتروندى ساۋداعا شىعارىلعان. ۇرلانعان كولىكتىڭ مەملەكەتتىك مۇلىكتەردىڭ تىزىمىنە قالاي كىرىپ كەتكەنىن پوليتسيا قىزمەتكەرلەرى انىقتاۋدا.

العاش رەت اتالمىش كولىك اقتوبە وبلىسىندا مەملەكەتتىڭ تەڭگەرىمىنە ەنگىزىلگەن. ونى اقتوبە وبلىستىق سوت اكتىلەرىن ورىنداۋ جونىندەگى وڭىرلىك دەپارتامەنتى قابىلداعان. بۇدان سوڭ كولىك استانا قالالىق سوت اكتىلەرىن ورىنداۋ دەپارتامەنتىنە، كەيىن استانانىڭ ادىلەت دەپارتامەنتىنە بەرىلگەن.

بيىلعى جىلى كولىك تىزىمنەن شىعارىلىپ، ەلەكتروندى ساۋداعا قويىلعان. قاراعاندى تۇرعىنى ونى 2017 -جىلدىڭ 18 -ءساۋىرى كۇنى 4 ميلليون 762 مىڭ 665 تەڭگەگە ساتىپ العان.

ايتا كەتەيىك، ۇرلانعانى بەلگىلى بولعان Toyota Land Cruiser Prado كولىگىن ەلەكتروندى ساۋدادان ساتىپ العان قاراعاندى تۇرعىنى وعان كەتكەن شىعىندى قايتارىپ العىسى كەلەدى. سونداي-اق ول ءوزىنىڭ شەنەۋنىكتەردىڭ كەسىرىنەن وسىنداي جاعدايعا تاپ بولعانى ءۇشىن وتەماقى تالاپ ەتپەك.

ول كولىككە جۇمساعان 4 ميلليون 762 مىڭ 665 تەڭگەنى قايتارىپ، 476 مىڭ 266 تەڭگە ۋاقىتقا كەتكەن شىعىندى، 100000 تەڭگە مورالدىق شىعىن ءۇشىن وتەماقى تالاپ ەتىپ، وزگە دە شىعىندار ءۇشىن 264465 تەڭگە الۋدى كوزدەپ وتىر.