بوكس: قازاقستان تۋماسى تيتۋلىن قورعادى

استانا. قازاقپارات - نەمىس بوكسشىسى كريستينا حاممەر گانالىق گيفتي امانۋا انكرانى نوكاۋتپەن جەڭدى، دەپ حابارلايدى Sports.kz.

ميۋنحەندە (گەرمانيا) وتكەن جەكپە-جەك ون راۋندقا ەسەپتەلگەن.

حاممەر قارسىلاسىن ءتورتىنشى راۋندتا نوكاۋتقا ءتۇسىرىپ، ورتا سالماقتاعى WBC جانە WBO تيتۋلىن قورعادى.

نەمىس سپورتشىسى ءۇشىن بۇل جەتىستىك كاسىبي رينگتەگى 22-جەڭىسى بولعان.

«ءالى دە چەمپيونمىن. مەن قارسىلاسىمدى ءتورتىنشى راۋندتا سۇلاتتىم. بۇل مەن ءۇشىن جاتتىعۋ سانالادى، سەبەبى مەنىڭ ارمانىم - ا ق ش- تا ۇلكەن ايقاستارعا شىعۋ جانە ول ارمانىم قاڭتاردا ورىندالماق. كومانداما، ماعان سەنگەن ادامدارعا راحمەت»، - دەپ جازدى حاممەر ءوزىنىڭ Instagram پاراقشاسىندا.

ايتا كەتەيىك، كريستينا قاراعاندى وبلىسىندا (نوۆودولينكا كەنتى) دۇنيەگە كەلگەن، كەيىن بالالىق شاعىندا اتا-اناسىمەن گەرمانياعا كوشىپ كەتكەن - قازىر سپورتشى دورتمۋندتا تۇرادى.