قىزىلوردادا ەلگە ەڭبەگى سىڭگەن سپورتشىلار ماراپاتتالدى

قىزىلوردا. قازاقپارات- «مۇز ايدىنى» سپورت كەشەنىنىڭ ءماجىلىس زالىندا اعىمداعى جىلدىڭ ەكىنشى جانە ءۇشىنشى توقسانىندا اتقارىلعان جۇمىستار قورىتىندىلاندى.

ماجىلىسكە اۋداندىق، قالالىق دەنە شىنىقتىرۋ جانە سپورت ءبولىمى باسشىلارى، بالالار مەن جاس وسپىرىمدەر سپورت مەكتەپتەرىنىڭ ديرەكتورلارى، ورىنباسارلارى قاتىستى.

بۇل تۋرالى قازاقپارات ءتىلشىسى حابارلادى. ءماجىلىستى باستاۋ الدىندا باسقارما باسشىسى ولجاس اكيموۆ سەگىز سپورتشىعا ق ر حالىقارالىق دارەجەدەگى سپورت شەبەرى، ق ر سپورت شەبەرى كۋالىكتەرىن تاپسىردى.

ونىڭ ىشىندە بوكستان قامشىبەك قوڭقابايەۆ ق ر ەڭبەك سىڭىرگەن سپورت شەبەرى اتاعىمەن ماراپاتتالسا، ۆەلوسپورتتان عابيدەن ازەن ق ر سپورت شەبەرى جانە حالىقارالىق دارەجەدەگى سپورت شەبەرى كۋالىكتەرىن يەلەندى.

قالعان سپورتشىلار نازەركە ومىرعاليەۆا (جەڭىل اتلەتيكا)، گۇلجاينا تىنىبەكوۆا، قوجاحمەت التىنبەك (ەكەۋى دە بايداركا مەن كانوەدە ەسۋ)، ەرسۇلتان ءالي (ۆەلوسپورت)، ءازيز ساناتبايەۆ پەن اقجول زايىپقا (ەكەۋى دە بوكس) ق ر سپورت شەبەرى كۋالىگى بەرىلدى.

كۇن تارتىبىندە 4№ جانە 5№ وبلىستىق وليمپيادالىق رەزەرۆتىڭ مامانداندىرىلعان بالالار مەن جاس وسپىرىمدەر سپورت مەكتەپتەرىنىڭ بىلىكتى سپورتشىلارى مەن سپورت رەزەرۆتەرىن دايىنداۋ جۇمىستارى، سىرداريا جانە جالاعاش اۋداندارىنىڭ دەنە شىنىقتىرۋ جانە سپورت بولىمدەرىنىڭ «دەنە شىنىقتىرۋ جانە سپورت سالاسىنىڭ نەگىزگى كورسەتكىشتەرى» اكىمشىلىك دەرەكتەردىڭ ناقتىلىعى تۋرالى حابارلامالار جاسالىندى.

القا ءماجىلىسى قارالعان ماسەلەلەر بويىنشا ءتيىستى قاۋلى قابىلدادى.