اقتوبەدە برازيليالىق دجيۋ-دجيتسۋدان تۋرنير ءوتىپ جاتىر
جارىسقا ەلىمىزدىڭ تۇكپىر-تۇكپىرىنەن كەلگەن 200 گە جۋىق جەتكىنشەكتەر جانە ەرەسەكتەر ءوزارا مىقتىنى انىقتادى.
ولاردىڭ باسىم بولىگى باتىس قازاقستان وبلىسىنىڭ نامىسىن قورعادى.
«ءبىز اقتوبە قالاسىندا ءتۋرنيردى ەكىنشى رەت ۇيىمداستىرىپ جاتىرمىز. جارىستار كۇنتىزبەسىن جاساعان كەزدە ءبىز بارلىق وبلىستاردى قامتۋ ءۇشىن، سول جەردە وتەتىن تۋرنيرلەردى ەنگىزەمىز. اقتوبەنى تاڭداعان سەبەبىمىز، ول باتىس قازاقستان وبلىسىنىڭ قالالارىنىڭ ىشىندە وتە ىڭعايلى ورنالاسقان. سوندىقتان كوپتەگەن جەرگىلىكتى سپورتشىلار جارىسقا قاتىسۋعا مۇمكىندىك الادى. وكىنىشكە قاراي، كورشى ەلدەردەن دجيتسەرلەر وزدەرىنىڭ جارىس كەستەلەرىنە بايلانىستى تۋرنيرگە قاتىسا المادى. ءبىراق ءبىز ولاردى جەلتوقسان ايىنىڭ 8 ءى مەن 10 ى ارالىعىندا الماتىدا وتەتىن Arlan Grip Selection ءتۋرنيرىنىڭ فينالىنا شاقىرامىز»، - دەپ اتاپ ءوتتى قازاقستاندىق برازيليالىق دجيۋ-دجيتسۋ جانە گرەپپلينگ فەدەراتسياسىنىڭ پرەزيدەنتى تولەگەن قۇماروۆ.
ادەتتەگىدەي، تۋرنير تورەشەلەردىڭ ەرەجە تۇسىندىرۋمەن باستالدى. اتالمىش جارىس ADCC جانە IBJJF ەرەجەلەرىنە سايكەس ءتۇرلى سالماق دارەجەلەرى بويىنشا ءوتتى.
بۇگىن جارىس جولىنا «G» نۇسقاسى بويىنشا 7 مەن 17 جاس ارالىعىندا جەتكىنشەكتەر جانە ەرەسەكتەر شىقتى.
«مەن «وردا» كلۋبىندا 3 جىل اينالىسامىن. بۇل جەرگە مەنى اكەم الىپ كەلدى. وسى سپورت ءتۇرىنىڭ العاشقى قادامدارىن بەينەروليكتەردى كورىپ، ۇيرەندىم. مەنىڭ ويىمشا، بۇگىنگى كۇنى دجيۋ-دجيتسۋ قارقىندى دامىپ كەلەدى. ءوزىمنىڭ باپكەرىمنەن ۇلگى الامىن. بولاشاقتا سول كىسىگە ۇقساپ، كوپتەگەن بەلەستەردى باعىندىرعىم كەلەدى»، - دەپ ءوز ويىممەن ءبولىستى جارىس جەڭىمپازى شاحان ەسەنكەلدين.
جەڭىمپازدار مەن جۇلدەگەرلەر ديپلوم مەن مەدالدەرمەن ماراپاتتالدى. ەندى، ءتۋرنيردىڭ سوڭعى كۇنىندە ەرەسەكتەر «NO G» نۇسقاسى بويىنشا باق سىنايدى. سپورتتىق شارانىڭ باستى ماقساتى قازاقستاندا دجيۋ-دجيتسۋدى دامىتىپ، ەلگە تانىتۋ، سپورت پەن سالاۋاتتى ءومىر سالتىن ناسيحاتتاۋ، سپورتشىلاردىڭ شەبەرلىكتەرىن ارتتىرۋ، ۇزدىكتەردى انىقتاۋ.
