ەر ادام دۇكەنگە بەكىنىپ الىپ، پوليتسياعا وق جاۋدىردى

استانا. قازاقپارات - ا ق ش- تىڭ مونتانا شتاتىنداعى بيللينگس قالاسىندا ەر ادام دۇكەنگە كىرىپ بەكىنىپ الىپ، وقيعا ورنىنا جەتكەن پوليتسياعا قارسى وق جاۋدىردى.

بۇل تۋرالى KTVQ. باسىلىمىنا سىلتەمە جاساپ korrespondent.net حابارلايدى.

باسىلىم تاراتقان مالىمەتتەرگە قاراعاندا، ەر ادام كولىكپەن عيماراتتى بۇزىپ كىرىپ، بەكىنىپ العان سوڭ، پوليتسەيلەرگە قاراتا وق اتا باستاعان. اتىلعان وق پوليتسەيلەردىڭ كولىگىنە ءتيدى. سونىمەن قاتار قاسكوي پوليتسياعا قارسى كوز قارىقتىرىپ، قۇلاق تۇندىراتىن گراناتا لاقتىرعان. وقيعانىڭ سالدارىنان زارداپ شەككەندەردىڭ بار-جوعى تۋرالى ازىرگە باسىلىم ەشتەڭە جازباعان.

پوليتسيا قىزمەتكەرلەرى دۇكەن مەن ونىڭ اينالاسىن قورشاۋعا الىپ، ەر اداممەن كەلىسسوزدەر جۇرگىزۋگە تىرىسقان. تەلەارنالاردىڭ ءبىرىنىڭ حابارلاۋىنشا، ەر ادامدى وسى وقيعاعا دەيىن وزگە دۇكەننەن قۋىپ شىققان، ويتكەنى ول دۇكەننەن اتىس قارۋىن ۇرلاماق بولعان.

Billings Gazette باسىلىمىنىڭ جازۋىنشا، دۇكەندە 10 ساعات بويى وتىرعان ەر ادام عيماراتتان شىعىپ قاشىپ كەتپەك بولعان. الايدا، پوليتسيامەن ارادا اتىس بولىپ، ەر ادام وقيعا ورنىندا كوز جۇمدى.