استانادا «نە؟ قايدا؟ قاشان؟» ويىنىنان الەم چەمپيوناتى وتۋدە
3-5 -قاراشا كۇندەرى استانادا وتەتىن بۇل ايتۋلى چەمپيوناتتا الەمنىڭ 26 ەلىنەن كەلگەن 69 كوماندا باق سىنايدى. قازاقستان رەسپۋبليكاسى اتىنان استانا، الماتى، قاراعاندى جانە اقتاۋ قالالارىنان كەلگەن 8 كوماندا قاتىسۋدا. سونداي-اق، نەگىزگى تۋرنير اياسىندا «حامسا» حالىقارالىق زياتكەرلىك ويىنىنىڭ العاشقى ۇلتتار كۋبوگى ءوتىپ جاتىر. وسىلايشا، تۋرنيرگە جالپى سانى 650 بىلگىر جينالدى.
چەمپيوناتتىڭ رەسمي اشىلۋىندا ءسوز سويلەگەن ا ح ق و باسقارۋشىسى قايرات كەلىمبەتوۆ «استانا» حالىقارالىق قارجى ورتالىعىنىڭ قازاقستانداعى ادامي كاپيتال مەن زياتكەرلىكتىڭ دامۋىنا جۇيەلى تۇردە قولداۋ ءبىلدىرىپ كەلە جاتقانىن اتاپ ءوتتى.
«كەز كەلگەن مەملەكەت ادامي كاپيتالدىڭ دامۋىنا قولداۋ بىلدىرەدى. ادامي كاپيتال مەن ونىڭ دامۋى - مەملەكەت باسشىسى بەكىتكەن ا ح ق و ستراتەگياسىنىڭ ماڭىزدى باعىتى. قازاقستاندا ءدال وسىنداي شارالاردىڭ ءوتىپ جاتقانى قۋانتادى جانە ءبىزدىڭ ەلىمىزدىڭ «نە؟ قايدا؟ قاشان؟ » ويىنىنىڭ سپوتتىق كۇنتىزبەسىندە نىق ورنىعارىنا ۇمىتتەنەمىز»، - دەدى ق. كەلىمبەتوۆ.
سايىستار «نە؟ قايدا؟ قاشان؟» ويىنىڭ ماگيسترى جانە كلۋبتاردىڭ حالىقارالىق قاۋىمداستىعىنىڭ پرەزيدەنتى اندرەي كوزلوۆتىڭ جانە الەكساندر درۋز، ماكسيم پوتاشەۆ، بالاش قاسىموۆ، ۆلاديمير انتوحين، ەليزاۆەتا وۆدەەنكو، الەكساندر رۋبين سىندى «نە؟ قايدا؟ قاشان؟» جۇلدىزدارىنىڭ قاتىسۋىمەن ءوتىپ جاتىر. سونداي-اق، استاناعا چ گ ك ەۋرازيالىق ليگاسىنىڭ ءتوراعاسى ازيزبەك يۋسۋفوۆ (وزبەكستان)، «حامسا» حالىقارالىق ويىنىنىڭ اۆتورلارى مەن نەگىزىن سالۋشى فايك گۋسەينوۆ (ازەربايجان) كەلدى.
«نە؟ قايدا؟ قاشان؟» تەلەويىنى ك س ر و- دا رەجيسسەر ۆلاديمير ۆوروشيلوۆ پەن رەداكتور ناتاليا ستەتسەنكونىڭ يدەياسىمەن قۇرىلعان. باعدارلامانىڭ العاشقى شىعارىلىمى 1975 -جىلدىڭ 4 -قىركۇيەگىندە ەفيردەن كورسەتىلگەن.
سپورتتىق «نە؟ قايدا؟ قاشان؟» - تەلەۆيزيالىق ويىننىڭ سايىستىق نۇسقاسى. مۇندا ارنايى كوماندالار قۇرىلىپ، جەڭىمپاز توپتى دۇرىس جاۋاپ سانىمەن انىقتايدى.
«حامسا» - 2011 -جىلى «نە؟ قايدا؟ قاشان؟» ويىنىنىڭ الەم بىرىنشىلىگىندە تانىستىرىلعان كوماندالىق زياتكەرلىك ويىن. ويىن ەرەجەسىنە سايكەس «حامسا» بەس سانىنىڭ اينالاسىندا قۇرىلعان: كوماندادا 5 ويىنشى بولادى جانە بارلىق ويىن 5 راۋندتان قۇرالادى.
