قازاقستاندىق ۆەلوشاباندوز الەم كۋبوگىنىڭ يەگەرى اتاندى

استانا. قازاقپارات - پولشادا ۆەلوترەك بويىنشا الەم كۋبوگىنىڭ ءبىرىنشى كەزەڭى باستالدى، وندا قازاقستان قۇراماسى الەمدىك ۆەلوسپورتتا كوشباسشى ەكەنىن تاعى ءبىر رەت دالەلدەدى.

«Track Team Astana» كومانداسىنىڭ 25 جاستاعى سپورتشىسى نيكيتا پاناسەنكو الەمدەگى ەڭ مىقتى ۆەلوسيپەدشىلەردى باسىپ وزىپ، ۇپاي بويىنشا جارىستا جەڭىمپاز اتاندى. بۇل تۋرالى «قازاقپارات» ح ا ا قازاقستان ۆەلوسپورت فەدەراتسياسىنىڭ باسپا ءسوز قىزمەتىنە سىلتەمە جاساپ حابارلادى.

ۇپاي بويىنشا جارىستىڭ جالپى قاشىقتىعى 30 كيلومەتردى قۇرادى. نەگىزگى تارتىس العاشقى ساتتەن-اق العا سۋىرىلىپ شىققان گرەك ۆەلوشاباندوزى كريستوس ۆوليكاكيس پەن نيكيتا پاناسەنكو اراسىندا ءوربىدى. ساۋاتتى ايلا-ارەكەت قولدانا العان قازاقستاندىق سپورتشى قارسىلاسىن شاڭ قاپتىرىپ كەتتى.

جارىس ناتيجەسى بويىنشا ۆوليكاكيس ەكىنشى ورىن، يتاليان ليام بەرتاتستسو ءۇشىنشى ورىن الدى.

ايتا كەتەيىك، الەم كۋبوگىنىڭ ءبىرىنشى كەزەڭى 5 -قاراشاعا دەيىن جالعاسادى، كۋبوكتىڭ كەلەسى كەزەڭدەرى 10-12 -قاراشادا  ۇلى بريتانيادا، 2-3 -جەلتوقساندا كانادادا، 9-10 -جەلتوقسان ارالىعىندا چيليدە جانە 19-21 -قاڭتار كۇندەرى بەلارۋستە وتەدى. 2018 -جىلدىڭ 28 -اقپانىنان 4 -ناۋرىزىنا دەيىن نيدەرلاندىدا ماۋسىمنىڭ باستى وقيعاسى - ۆەلوترەك بويىنشا الەم چەمپيوناتى وتەدى.