الماتى اكىمى كۇزگى اعاش ەگۋ جۇمىستارىنا قاتىستى - فوتو
الماتى اكىمى باۋىرجان بايبەك، ءماسليحات دەپۋتاتتارى، قوعام وكىلدەرى جانە قالانىڭ كوممۋنالدىق قىزمەت كاسىپورىندارىنىڭ قىزمەتكەرلەرى جاياۋ جۇرگىنشىگە باسىمدىق بەرىپ، قايتا جاسالعان پانفيلوۆ، جىبەك جولى، قابانباي باتىر، گوگول كوشەلەرى مەن «استانا» الاڭىنا اعاش وتىرعىزۋ شاراسىنا قاتىستى.
بۇگىن ءتالىمباقتا وسىرىلگەن، %100 تامىر جايىپ كەتەتىن بۇتاق جارعان تەرەك، قايىڭ، ەمەن اعاشتارى وتىرعىزىلدى. جالپى، جوبا بويىنشا قايتا جاڭعىرعان بەس كوشەدە اللەيالى جانە پەيزاجدى 2312 اعاش، 3 مىڭنان استام بۇتاقتار مەن كوپتەگەن گۇلزارلار وتىرعىزۋ جوسپارلانعان. اعاشتىڭ باسىم كوپشىلىگى وسى ايدا، ال قالعاندارى كوكتەمگى ماۋسىمدا وتىرعىزىلادى.
كەلەر جىلى رەكونسترۋكسيالانعان كوشەلەردە دەكوراتيۆتى الما اعاشتارى، اكاتسيا، بۇتاقتار، سپيرەيا، قاراقات پەن كەڭتامىر گۇل جاراتىن بولادى. ەمەن مەن تەرەك كولەڭكەلى كەڭىستىكتى قالىپتاستىرادى، ال قايىڭ مەن شىرشا، تۇيا جىل بويىنا قىلقان يىسىمەن تىنىستاتادى.
«الماتى - باقپەن كومكەرىلگەن ارۋ قالا، سوندىقتان ءبىز بۇرىننان بار اعاشتاردى ساقتاي وتىرىپ، جاسىل جەلەك قورىن ۇلعايتۋعا مىندەتتىمىز. بۇگىنگى كۇنى قالا بيزنەسمەندەرى «تۋعان جەر» باعدارلاماسى اياسىندا ينفراقۇرىلىمدى جوبالارعا عانا ەمەس، سونىمەن قاتار اعاش وتىرعىزۋعا دا بەلسەنە قاتىسۋدا، ال بۇل وتە ماڭىزدى. ءبىزدىڭ اسەم قالامىز بۇرىنعىدان دا سۇلۋ ءارى جاسىل جەلەككە ورانا ءتۇسۋى ءۇشىن قالالىقتاردى وسى باستامانى قولداۋعا شاقىرامىن»، - دەدى باۋىرجان بايبەك.
جالپى، بيىلعى جىلى الماتىدا 26 مىڭنان استام اعاش وتىرعىزىلدى، تاعى دا 5 مىڭ جاسىل جەلەك وتىرعىزۋ جوسپارلانعان. بۇلاردان وزگە، كومپەنساتسيالىق جانە باستاماشىل تۇرعىدا 7 مىڭ اعاش وتىرعىزىلاتىن بولادى. بيزنەستىڭ الەۋمەتتىك جاۋاپكەرشىلىگى اياسىندا قالادا جىل اياعىنا دەيىن 210 اعاش وتىرعىزىلادى. مىسالى، كاسىپكەرلەر مەڭدىقۇلوۆ كوشەسىنىڭ بويىنا 15 اعاش، كولىك تۇراعى بولعان فۋرمانوۆ كوشەسىنىڭ بويىنا (ساتپايەۆ كوشەسىنەن تومەن) 31 تەرەك وتىرعىزدى.
الماتىدا بيىلعى جىلى قالانىڭ تاريحي ورتالىعىنىڭ ۇشتەن ءبىرى قايتا جاسالدى، جاڭعىرۋ اياسىندا عيماراتتاردىڭ سىرتقى كەلبەتى ارلەندى، قۇرعاق فونتاندار پايدا بولدى، اۆتورلىق ارحيتەكتۋرالىق كىشى پىشىندەر قويىلدى، دەمالىس ايماقتارى، بالالار الاڭدارى جاسالدى، جاسىل جەلەكتى سۋارۋ جەلىسى جۇرگىزىلدى.
