الماتى وبلىسىنىڭ شارۋالارى وبلىس اكىمىنەن كومەك سۇراپ وتىر - فوتو
سويا ەككەن ديقانشىلار 70 گەكتار ەگىن سۋ استىندا قالدى دەپ دابىل قاعۋدا. قازىر القاپقا تەحنيكا كىرە الماي، باتپاققا باتىپ جاتىر، دەپ حابارلايدى قازاقپارات ءتىلشىسى.
ال شارۋالاردىڭ ايتۋىنشا، ەگىندى سۋ باسۋىنا درەناج جۇيەسى سەبەپ ەكەن. ءتىپتى ەگىستىك القابىنداعى جەر استى سۋى اۋىل ورتاسىنا دەيىن جەتكەن. ءقازىر مۇسابەك اۋىلىنداعى ۇيلەردىڭ جەرتولەسىندە كوتەرىلگەن سۋ تىزەگە دەيىن جەتەدى.
«ءبىز تەك وبلىس اكىمى اماندىق باتالوۆتان كومەك سۇرايمىز. بىزگە باسقا ەشكىم كومەكتەسە المايدى. ءبىزدىڭ باراتىن جەرىمىز جوق. سۇرايتىنىمىز درەناج جۇيەسىن قالپىنا كەلتىرىپ، قازىپ، تازالاپ بەرسە بولدى. وسى ەگىنمەن بالا- شاعامىزدى اسىراۋدامىز. بىزگە كومەك كەرەك»، دەيدى مۇسابەك اۋىلىنىڭ تۇرعىنى، شارۋا قوجالىعىنىڭ جەتەكشىسى اسحات ورالوۆ.
ال مۇسابەك اۋىلدىق وكرۋگىنە ەكى اي بۇرىن عانا تاعايىندالعان اكىم جاعدايدان حاباردارمىن دەيدى.
«بيۋدجەتتەن قارجى قارالىپ جاتىر. وسى جىلدىڭ سوڭىنا دەيىن وڭ شەشىمىن تابادى. كەلەر جىلى كارىز جۇيەلەرى قولعا الىنىپ، تازالانادى»، دەيدى مۇسابەك اۋىلدىق وكرۋگىنىڭ اكىمى جاندوس جۇماعۇلوۆ.
شارۋالار ءار گەكتاردان كەمىندە 2 توننا ءونىم الاتىنبىز دەيدى. قازىر نارىقتا سويانىڭ ءار تونناسى 100 مىڭ تەڭگەدەن دەپ ەسەپتەسەك، 70 گەكتار جەردەگى ءونىمنىڭ قۇنى 14 ميلليون تەڭگە ەكەن. قىرۋار قارجى دالاعا كەتتى، ەڭبەگىمىز ەش بولدى دەگەن شارۋالاردىڭ سوڭعى ءۇمىتى وبلىس اكىمىندە. ماسەلە شەشىلەدى دەپ ۇمىتتەرىن ۇزبەي وتىر.
