قىزمەتتىك كولىكتى جەكە شارۋاسىنا پايدالانعان شەنەۋنىك قارا جۇمىسقا جەگىلدى - فوتو

استانا. قازاقپارات - قىزمەتتىك كولىكتى جەكە پايداسىنا جاراتقان وسكەمەن قالاسى اكىمىنىڭ ورىنباسارى راسۋل ماناپوۆ قوعامدىق جۇمىستى باستاپ كەتتى.

بۇل تۋرالى وسكەمەن قالاسى اكىمىنىڭ باسپا ءسوز حاتشىسى اسەم سەكسەنوۆا فەيسبۋك پاراقشاسىندا جازدى، دەپ حابارلايدى «قازاقپارات» ح ا ا ءتىلشىسى.

ەسكە سالا كەتسەك، ق ر مەملەكەتتىك قىزمەت ىستەرى اگەنتتىگىنىڭ ش ق و بويىنشا دەپارتامەنتىنىڭ ەتيكا بويىنشا كەڭەسىندە وسكەمەن قالاسى اكىمىنىڭ ورىنباسارى راسۋل ماناپوۆتىڭ قىزمەتتىك كولىكتى جەكە پايداسىنا جاراتقانى تۋرالى شۋلى وقيعا تاراعان بولاتىن. قازان ايىندا، جەكسەنبى كۇنى راسۋل ماناپوۆ دەمالىس بازاسىنا ءوزىنىڭ قىزمەتتىك كولىگىمەن بارىپ، دەمالىپ جۇرگەنى بەلگىلى بولعان. قالا اكىمىنىڭ ورىنباسارى وزىنە تاعىلعان كىنانى تولىق مويىنداپ، «وسكەمەن ءتارتىپ» كاسىپورنىندا 20 ساعات قوعامدىق جۇمىس اتقارۋعا مىندەتتەلگەن ەدى.

«قوعامدىق جۇمىستى قالا اكىمىنىڭ ورىنباسارى مەملەكەتتىك قىزمەت ۋاقىتىنان تىس اتقاراتىن بولادى. بۇگىن ول «وسكەمەن ءتارتىپ» كوممۋنالدىق كاسىپورنىنىڭ بريگادا قۇرامىندا 4 ساعات جۇمىس ىستەدى. راسۋل ماناپوۆ رەسپۋبليكا داڭعىلىنداعى سۋبۇرقاقتى قىسقى ماۋسىمعا ازىرلەۋ جۇمىسىنا اتسالىستى»، - دەيدى اسەم سەكسەنوۆا فەيسبۋك پاراقشاسىندا.

بريگاداعا جەتەكشىلىك ەتىپ جۇرگەن ماقسات نۇراحمەتوۆ مەملەكەتتىك قىزمەتكەردىڭ قوعامدىق جۇمىسقا ارالاسىپ جۇرگەنىن ءبىرىنشى رەت كورگەنىن ايتادى.

«قالا اكىمىنىڭ ورىنباسارى بار كۇشىن، ىنتا-جىگەرىن سالىپ جۇمىس اتقاردى. جارادى!» - دەيدى ماقساتنۇراحمەتوۆ.

ايتا كەتەرلىگى، بۇعان قوسا وسكەمەن قالاسىنىڭ اكىمى قۋات تۇمابايەۆ قىزمەتتىك كولىكتى جەكە پايداسىنا جاراتقانى ءۇشىن راسۋل ماناپوۆقا ەكى اي بويى قىزمەتتىك كولىكتى پايدالانۋعا تىيىم سالعان بولاتىن. ورىنباسار قاڭتار ايىنىڭ بىرىنە دەيىن ول جۇمىسقا قوعامدىق كولىكپەن كەلەتىن بولادى.