اتىراۋدا مۇگەدەك بالالاردى جىلقىمەن ەمدەمەك

استانا. قازاقپارات - كانيستەراپيا ورتالىعىنىڭ جەتەكشىسى ەرلان كۇمىسقاليەۆ ايماقتا جىلقىمەن ەمدەۋ ءىسىن دامىتۋدى كوزدەپ وتىر، - دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.

بۇكىل حالىقتىق داۋىس بەرۋ قورىتىندىسىمەن ەرلان كۇمىسقاليەۆ «قازاقستاننىڭ 100 جاڭا ەسىمى» جوباسىنا قاتىسۋعا ۇسىنىلعان ەدى. اتىراۋ وبلىسىنان جوباعا 7 ۇمىتكەر ىرىكتەلدى، ونىڭ قاتارىندا «اتىراۋ. شاعىن ەل» قوعامدىق بىرلەستىگىنىڭ جەتەكشىسى دە بار. ۇيىم قىزمەتى جۇلىن جانە باس ميى زاقىمدانعان بالالاردى ەمدەۋ مەن ساۋىقتىرۋعا نەگىزدەلگەن.

«اتىراۋ. شاعىن ەل» قوعامدىق بىرلەستىگىنىڭ قۇرىلعانىنا بيىل 5 جىل بولدى. وسى ۋاقىت ارالىعىندا كانيستەراپيا ءادىسى ارقىلى ءار ءتۇرلى سىرقاتقا شالدىققان 300 دەن استام بالا ەم- دومنان ءوتتى. ەرلان كۇمىسقاليەۆ ەندى جىلقىلاردىڭ كومەگىمەن يپپوتەراپيا ارقىلى بالالاردى ەمدەۋگە نيەتتەنىپ وتىر. يپپوتەراپيا ورتالىعى اتىراۋدا كاسىپكەرلەر مەن ىنتالى ازاماتتاردىڭ قولداۋىمەن سالىنادى.

«ەكى جىل بۇرىن ءبىزدىڭ ەكى جاتتىقتىرۋشىمىز گرۋزيادا بىلىكتىلىكتەرىن ارتتىرىپ، يپپوتەراپيەۆت- ينسترۋكتوردىڭ حالىقارالىق سەرتيفيكاتىن الدى. سودان كەيىن جىلقىمەن ەمدەۋ ورىنىن اشۋدى جوسپارلادىق. جەرگىلىكتى بيلىك 5 گەگتار جەر تەلىمىن بەردى، ەندى كاسىپكەرلەر مەن قايىرىمدى جانداردىڭ كومەگىمەن يپپوتەراپيا ورتالىعىنىڭ قۇرىلىسى باستالدى»، - دەيدى ەرلان كۇمىسقاليەۆ.

 ورتالىق قۇرىلىسى اتىراۋ قالاسىنىڭ ماڭىنداعى اقجار اۋىلىندا بوي كوتەردى. قۇرىلىس كەلەر جىلدىڭ كوكتەمىندە اياقتالادى دەگەن جوسپار بار. ەرلان كۇمىسقاليەۆتىڭ ايتۋىنشا، ەرىكتىلەر مەن دەمەۋشىلەر قۇرىلىسقا قاجەتتى جاعدايدىڭ ءبارىن جاساپ وتىر.