مۇحتار قۇل-مۇحاممەد: «نۇر وتان» پارتياسىنا قابىلداۋ تالابى كۇشەيتىلدى

استانا. قازاقپارات - «نۇر وتان» پارتياسى قاتارىنا قابىلداۋ تالابى كۇشەيتىلدى.

بۇگىن استانادا «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد وسىلاي ءمالىم ەتتى، دەپ حابارلايدى قازاقپارات.

«اسا مارتەبەلى ەلباسى! ءسىز قازاق ەلىن دامۋدىڭ دارا جولىنا باستايتىن ەڭ قۋاتتى كۇش دەپ باعا بەرگەن «نۇر وتان» پارتياسى 18 جىل بۇرىن ءوز جۇمىسىن باستاعاندا نە تۇراقتى جۇمىس ىستەيتىن قۇرىلىمدارى، نە وزىنە تيەسىلى عيماراتى، نە قاجەتتى قارجى قاراجاتى جوق بولدى.

وسى جىلدار ىشىندە ءسىزدىڭ پاراساتتى توراعالىعىڭىزبەن وركەندەپ، ميلليوننان استام مۇشەسى بار، 16 وبلىستىق جانە استانا مەن الماتى قالالىق، 227 اۋداندىق ءارى تەرريتوريالىق، 5824 باستاۋىش ۇيىمداردان تۇراتىن ەلىمىزدىڭ ەڭ ۇلكەن ساياسي پارتياسىنا اينالدى. ءسىز ۇسىنعان ۇلتتىق ستراتەگياعا ساي الەمدەگى ەڭ ۇزدىك پارتيالار جيناقتاعان تاجىريبەلەردى ەسكەرە وتىرىپ، «نۇر وتان» پارتياسى بۇگىندە ينستيتۋتسيونالدىق جاعىنان ابدەن تولىستى دەپ نىق سەنىممەن ايتا الامىز. سوندىقتان قازىرگى كەزەڭدە پارتيا قاتارىنا قابىلداۋ تالابى كۇشەيتىلىپ، وزىنە دە، پارتياعا دا ابىروي اكەلەتىن، ەلگە ءسوزى وتەتىن، جاۋاپكەرشىلىك جۇگىن سەزىنە بىلەتىن بەدەلدى ازاماتتار عانا قابىلدانۋدا»، - دەدى م. قۇل-مۇحاممەد «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا.

وسى ورايدا ول عاسىرلار جۇگىن ارقالاعان ەل تاۋەلسىزدىگىنىڭ ءار جىلى ەرەكشە تاريحي وقيعالارعا تولى بولعانىن، ءۇش بىردەي جاڭعىرۋعا، كونستيتۋتسيالىق رەفورماعا، ەكونوميكاداعى ءۇشىنشى جاڭعىرۋعا، ۇلت رۋحانياتىن جاڭا بيىككە كوتەرگەن «رۋحاني جاڭعىرۋعا» جارقىن جول اشىلعانىن اتاپ ءوتتى.

«وسى ءۇش جاڭعىرۋ جاريالانعان كۇننەن باستاپ، نۇروتاندىقتار پارتيا ءتوراعاسىنىڭ تاريحي باستامالارىن ءار قازاقستاندىقتىڭ جۇرەگىنە جەتكىزۋگە بار كۇش-جىگەرىن جۇمساپ كەلەدى. پارتيانىڭ كۇندەلىكتى جۇمىسىندا رەسپۋبليكا ۇكىمەتىمەن بىرلەسە قابىلدانىپ، 2021-جىلعا دەيىنگى مەرزىمدەگى سايلاۋالدى باعدارلاماسىن ورىنداۋ ءبىرىنشى كەزەكتە تۇر. پارتيانىڭ رەسپۋبليكالىق جەلىلىك كەستەسىنە ساي، جىل باسىنان بەرى 5 ميلليوننان استام ادامدى قامتىعان 85 مىڭعا جۋىق ءىس-شارانىڭ ناتيجەسىندە، باعدارلامادا بەلگىلەنگەن مەجەلىك كورسەتكىشتەردىڭ 96 پايىزى بۇگىندە ورىندالدى»، - دەپ اتاپ ءوتتى مۇحتار قۇل- مۇحاممەد.