قازاقستان حالقىنىڭ ەۋروپالىقتارعا قاراعاندا نەلىكتەن از ءومىر سۇرەتىنى انىقتالدى
بۇل تۋرالى قوعامدىق دەنساۋلىق ساقتاۋ قىزمەتىنىڭ دامۋىنا ارنالعان باسپا ءسوز كونفەرەنسياسىندا قازاقستان دەنساۋلىق ساقتاۋ مينيسترلىگى دەنساۋلىق ساقتاۋدى دامىتۋ رەسپۋبليكالىق ورتالىعىنىڭ باس ديرەكتورى اينۇر ايىپحانوۆا ايتتى، دەپ حابارلايدى Sputnik قازاقستان ورتالىق كوممۋنيكاتسيالار قىزمەتىنىڭ سايتىنا سىلتەمە جاساپ.
سونداي-اق ەلىمىزدە ايەلدەرمەن سالىستىرعاندا ەرلەردىڭ ورتاشا ءومىر ءسۇرۋ جاسى 9 جىلعا تومەن، ايەلدەردە بۇل كورسەتكىش 76,5 جاس بولسا، ەرلەردە - 67,5.
«مۇنىڭ باستى سەبەبى سالاۋاتتى ءومىر سالتىنىڭ بولماۋىنان تۋىندايتىن سوزىلمالى ينفەكسيالىق ەمەس اۋرۋلار، ونىڭ ىشىندە قانت ديابەتى، جوعارعى قان قىسىمى جانە 15-29 جاس ارالىعىنداعى جاستاردىڭ جول اپاتى، سۋيتسيت سالدارىنان باقيلىق بولۋى سەبەپ بولىپ وتىر»، - دەيدى سپيكەر.
د د س ۇ ساناعى بويىنشا قازاقستاندا تەمەكى مەن ىشىمدىككە قارسى شارالار جۇرگىزىلىپ جاتسا دا، بۇل كورسەتكىش ءالى كۇنگە وڭ ناتيجە كورسەتپەي وتىر. ەلىمىزدە ەركەكتەردىڭ %46 شىلىم شەكسە، ايەلدەردە بۇل كورسەتكىش %5.
الايدا 14-18 جاس ارالىعىنداعى، مەكتەپ جاسىنداعى جاس قىزداردىڭ تەمەكى شەگۋ كورسەتكىشى كۇننەن-كۇنگە وسۋدە. ىشىمدىك بويىنشا ەۋروپا ەلدەرىمەن بىردەي كورسەتكىشتى كورسەتەدى. ەلىمىزدە ايەلدەردىڭ %70، ەركەكتەردىڭ %30 ى ىشىمدىك ىشپەيدى. الايدا بىزدەگى ىشىمدىكتەردىڭ ەۋروپا ەلدەرىمەن سالىستىرعاندا كۇشتى بولۋى سەبەپتى دەنساۋلىققا تيگىزەر زيانى دا وراسان.
سونىمەن قاتار، ەلىمىزدە قانت، تۇز، ترانسمايلاردى قولدانۋ جاعىنان كورسەتكىش ناشار. د د س ۇ بەكىتكەن كۇندەلىكتى تۇتىنۋعا ارنالعان تۇز مولشەرى 5 گرام بولۋى كەرەك، الايدا بىزدە كەيبىر وبلىستاردا ورتاشا تۇز تۇتىنۋ مولشەرى 16 گرامنان اسادى.
كۇنىنە تۇتىنىلاتىن قانت مولشەرى 25 گرامنان اسپاۋى كەرەك، وكىنىشكە وراي ەلىمىزدە بۇل كورسەتكىش ەرەسەكتەر اراسىندا 100 گرام، ال بالالار اراسىندا كۇنىنە 150-160 گرامنان اسىپ ءتۇسىپ وتىر. ەلىمىزدە ءار ءبىر 5- بالا ارتىق سالماق جيناعان.
