قازاقستان قىزدارى ازيا چەمپيوناتىن ءساتسىز باستادى

استانا. قازاقپارات - ۆەتنام ەلىنىڭ حوشيمين قالاسىندا بوكستان ءوتىپ جاتقان ازيا چەمپيوناتىنىڭ العاشقى كۇنى ەكى قازاقستاندىق ارۋ جارىس جولىنان شىعىپ قالدى، دەپ حابارلايدى قازاقپارات ءتىلشىسى.

ازيا بىرىنشىلىگىنىڭ ءبىرىنشى كۇنى ءۇش بۇرىمدى بوكسشىمىز شارشى الاڭعا شىققان بولاتىن. وكىنىشكە قاراي، 54 كەلى سالماقتا سىنعا تۇسكەن وتانداسىمىز دينا جولامان مەن 60 كەلىدە شارشى الاڭعا شىققان ريمما ۆولوسەنكو قارسىلاستارىنان ۇتىلىپ قالدى.

دينا جولامان سولتۇستىك كورەيالىق كيم سونگ سيمنەن جەڭىلسە، ريمما ۆولوسەنكو وڭتۇستىك كورەيالىق و ەونجيدەن ۇتىلدى.

ال 48 كەلىدە ەل نامىسىن قورعاپ جاتقان ارۋىمىز الۋا بالقىبەكوۆا باسەكەنى جەڭىسپەن باستاپ، كەلەسى اينالىمعا ءوتتى.

ول العاشقى جەكپە-جەگىندە قىتايلىق حە لين يۋننەن باسىم ءتۇستى.

ەستەرىڭىزگە سالا كەتەيىك، بۇل دودادا قازاقستان قۇراماسى تولىق قۇرامدا ونەر كورسەتىپ جاتىر. ازيا چەمپيوناتىنا 22 ەلدەن 118 سپورتشى باق سىناۋدا.

اۆتور: كۇنسۇلتان وتارباي