شىمكەنت مۋزەيىندە وليمپيادا چەمپيونى بەكزات ساتتارحانوۆتىڭ سپورتتىق كيىمدەرى ساقتاۋلى

شىمكەنت. قازاقپارات - وڭتۇستىك قازاقستان وبلىسىنىڭ تاريحي-ولكەتانۋ مۋزەيىندە مەكتەپ وقۋشىلارىنا تەگىن ەكسكۋرسيا ۇيىمداستىرىلدى.

ءوڭىردىڭ ءار قالا، اۋدانىنان كەلگەن بالالار مۇراجايداعى تاريحي جادىگەرلەرمەن تانىستى، دەپ حابارلايدى قازاقپارات ءتىلشىسى.

ايتۋلى شارا ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا بالالاردىڭ ەل تاريحى مەن مادەنيەتىن ءبىلۋ، ءوز وتانىنىڭ تاعدىرىنا، ونىڭ وتكەنىنە، بۇگىنى مەن بولاشاعىنا ءوزى قاتىستى ەكەندىگىن سەزىنۋى ماقساتىندا ۇيىمداستىرىلدى.

وندا اتا-اناسىنىڭ قامقورلىعىنسىز قالعان جەتكىنشەكتەر «وبلىس تاريحى-2017» دەپ اتالاتىن كەرۋەن-شەرۋگە قاتىسىپ، وبلىستاعى ەڭ ۇلكەن مۇراجايدى ارالاۋعا مۇمكىندىك الدى.

ۇيىمداستىرۋشىلاردىڭ ايتۋىنشا، يگى شارا بالالاردىڭ ءوز وتانىنا دەگەن سۇيىسپەنشىلىگى مەن ازاماتتىق سانا سەزىمى نەگىزىندە ءوز ەلىنە پايدا كەلتىرۋگە دەگەن تالپىنىسىن قالىپتاستىرۋ باعىتىندا وتكىزىلدى.

مۇراجاي قىزمەتكەرلەرى ساياحاتتاپ كەلگەندەرگە ولكەنىڭ ارحەولوگياسى مەن پايدالى قازبالارى، دارىلىك شوپتەرى تۋرالى كەڭىرەك ماعلۇمات بەردى. بالالارعا كۇش اتاسى قاجىمۇقان مۇڭايتپاس ۇلىنىڭ ۇرپاقتارى سىيلاعان كيىز ءۇي قاتتى ۇنادى.

سونىمەن قاتار ولكەنىڭ ماقتانىشى بولعان بوكسشى، سيدنەي وليمپياداسىنىڭ چەمپيونى بەكزات ساتتارحانوۆتىڭ سپورتتىق كيىمدەرى تاڭ تاماشا ەتتى. جەتكىنشەكتەردە وڭتۇستىكتىڭ تاريحى مەن مادەنيەتىنە دەگەن ماقتانىش سەزىمى ۇيالاپ، كوتەرىڭكى كوڭىل-كۇيمەن تارقاستى.