اكىمدەر ءوز قالتاسى مەن مەملەكەت قازىناسىن شاتاستىرىپ الماۋى كەرەك - ساپاربايەۆ
ەلىمىزدە اۋىل اكىمدەرىنىڭ ءوز بيۋدجەتى بولادى.
«جەرگىلىكتى ءوزىن ءوزى باسقارۋدى دامىتۋ ماسەلەلەرى تۋرالى» زاڭىنا سايكەس حالىق سانى 2 مىڭنان اساتىن اۋىلدار كەلەر جىلى بىرنەشە سالىقتان تۇسكەن قارجىنى جەرگىلىكتى جەرگە جۇمسايدى. ال 2020 -جىلداپ باستاپ بارلىق اۋىل اكىمى بيۋدجەت قارجىسىنىڭ يگەرىلۋىنە، ماقساتتى جۇمسالۋىنا جاۋاپ بەرەدى. بۇرىن قۇجاتتاردى قاعاز جۇزىندە راسىمدەگەن اكىمدەر ەندى كومپيۋتەرگە وتىرىپ، ەلەكتروندى فورماتتا جۇمىس ىستەيدى. بارلىق اۋىلعا تەحنيكا جەتكىزىلىپ، قازىر ينتەرنەتكە قوسۋ جۇمىسى ءجۇرىپ جاتىر.
«سوڭعى جىلدارى جەرگىلىكتى بيلىكتىڭ ءرولىن كۇشەيتۋ ءۇشىن ءتورتىنشى دارەجەدەگى بيۋدجەتتى ەنگىزۋ جۇمىسى جۇرگىزىلىپ جاتىر. بۇل وتە دۇرىس شەشىم. جەرگىلىكتى اكىمدەردىڭ ءوز بيۋدجەتى بولۋى كەرەك. ولار ءوز شىعىنىن وزدەرى جوسپارلاپ، قارجىنى جۇمساۋى ءتيىس. اقتوبە وبلىسىندا ۇكىمەت تاپسرماسىنا سايكەس جۇمىس ءجۇرىپ جاتىر. وڭىردە بارلىعى 147 اۋىلدىق وكرۋگ بار. ونىڭ 50- ءى كەلەر جىلدان باستاپ ءوز بيۋدجەتىن باسقارادى. بارلىق دەڭگەيدەگى اكىمنىڭ قارجىلىق، ەكونوميكالىق ساۋاتتىلىعىن ارتتىرۋ ءۇشىن ارنايى سەمينار ءوتتى. اكىمدەر جۇمىسقا دايىن»، - دەدى اقتوبە وبلىسىنىڭ اكىمى بەردىبەك ساپاربايەۆ.
قازىناعا تۇسكەن قارجىنى باسقارۋ ءۇشىن بارلىق اكىمگە كومپيۋتەر بەرىلىپ، ينتەرنەتكە قوسىلادى. بۇل جۇمىس اقتوبەدە تۇگەل اتقارىلدى.
«بىرىنشىدەن، اكىمدەر زاڭدى ساقتاۋى كەرەك. ەكىنشىدەن، ءوز قالتاسى مەن مەملەكەت قازىناسىن شاتاستىرماۋى ءتيىس. سوندا جۇمىس جۇرەدى»، - دەدى بەردىبەك ساپاربايەۆ.
اۋىل اكىمدەرىنىڭ فورۋمى كەزىندە مەملەكەتتىك ساتۋ، ساتىپ الۋدى جۇرگىزەتىن ماماندارعا سۇرانىستىڭ ارتۋى مۇمكىن دەگەن بولجام ايتىلدى. بۇل الداعى ۋاقىتتا قارالاتىن سۇراق. سەبەبى، اۋىل حالقىنىڭ سانى ءوسىپ وتىرعان كەزدە قىزمەتكەرلەردىڭ جۇكتەمەسى ارتىپ، سۇرانىس بولۋى مۇمكىن.
«جەرگىلىكتى ءوزىن ءوزى باسقارۋ كەزىندە سالىقتان تۇسكەن قارجىنى اۋىل اكىمى باسقارادى. جەكە تۇلعالاردان الىناتىن مۇلىك، كولىك، جەر سالىقتارىنان تۇسكەن قارجى بيۋدجەتتى تولىقتىرادى. سول قارجى اۋىلدىڭ ينفراقۇرىلىمىن جاڭارتۋعا، كوگالداندىرۋ جۇمىستارىنا جۇمسالادى. اكىم قارجىنى ءوز ەركىمەن باسقارا المايدى. اۋىل تۇرعىندارىن جيناپ، كەزدەسۋ وتكىزىپ، بەلسەندىلەرمەن اقىلداسىپ، ەڭ وزەكتى پروبلەمالاردى شەشەدى»، - دەدى ۇلتتىق ەكونوميكا ۆيتسە- ءمينيسترى ايباتىر جۇماعۇلوۆ.
ايتا كەتەيىك، اۋىل اكىمدەرىنىڭ كەيبىرى ءوزىنىڭ تىكەلەي مىندەتىن بىلمەي، سالىق ينسپەكتورىنىڭ، وزگە قىزمەتكەرلەردىڭ جۇمىسىن اتقارىپ كەتكەن جاعدايلار كەزدەسكەن. سوندىقتان ءار اكىم زاڭدى قايتا وقىپ، ۇيىمداستىرۋشىلىق قابىلەتىن ارتتىرۋى كەرەك. ەلىمىزدە ۇلتتىق ەكونوميكا مينيسترلىگى مەن «قازاق تەلەكوم» ا ق اۋىلدارعا ينتەرنەت جەلىسىن تارتۋدى جوسپارلادى. جىل سوڭىنا دەيىن تاعى 4 اۋىلعا ينتەرنەت تارتىلادى.
اۆتور: التىناي ساعىندىقوۆا
