شىمكەنتتىك وقۋشىلار لاتىن ءالىپبيىن تاسجولعا ءتۇسىردى - فوتو
«شىمكەنت سيتي» قالاشىعىندا ۇيىمداستىرىلعان «قوش كەلدىڭ، قازاق ءالىپبيى!» شاراسىندا جەتكىنشەكتەر تاسجولعا سۋرەت سالدى، دەپ حابارلايدى قازاقپارات ءتىلشىسى.
قالا ىشىندەگى بولاشاق قالاشىقتا وتكەن ءىس-شارادا وقۋشىلار اسفالت جانە مولبەرتكە سۋرەت سالۋ كونكۋرسىنا قاتىستى. مۇندا جاس سۋرەتشىلەر تۋىندىلارىنىڭ كورمەسى ءوتتى.
وقۋشىلار لاتىن الىپبيىندەگى ءار دىبىستى وزىنشە بەينەلەدى. وسىلايشا، جەرگە جاڭا الفاۆيتتى سالىپ شىقتى. بۇعان قوسا اۋلا كلۋبتارىنىڭ تاربيەلەنۋشىلەرى مەن قالانىڭ ءبي ۇجىمدارىنىڭ قاتىسۋىمەن فلەشموب ءوتتى. شىمكەنتتىڭ بولاشاقتاعى بەينەسىن ءوز قيىلدارىمەن سۋرەتتەۋگە تىرىستى.
ايتا كەتەيىك، «شىمكەنت سيتي» جوباسى 2015-جىلى شىمكەنت قالالىق ءماسليحاتىنىڭ سەسسياسىندا تانىستىرىلعان. جوبا بويىنشا 427 گەكتار اۋماقتا 70 مىڭ تۇرعىنعا شاقتالعان قالا ىشىندەگى قالا بوي كوتەرەدى.
مۇنداعى قۇرىلىس 2016-جىلى باستالدى. قازىر بۇل اۋداندا كوممۋنالدىق جەلىنىڭ، 7 جول مەن 20 ءۇيدىڭ قۇرىلىسى اياقتالىپ قالدى. الداعى ۋاقىتتا مۇندا كوپ قاباتتى 316 ءۇي سالىنىپ، جالپى اۋدان 12 ورامعا بولىنەدى دەپ جوسپارلانۋدا. الەۋمەتتىك مەكەمەلەر - مەكتەپتەر، بالاباقشالار مەن ۇلكەن ساياباق تا سالىنادى.
