تۇركىستاندا ياساۋي مۇراسىن ناسيحاتتاعان حالىقارالىق جيىن ءوتتى
تۇركىستان قالاسىندا وتكەن شاراعا ق ر مادەنيەت جانە سپورت مينيسترلىگى، «ازىرەت سۇلتان» مەملەكەتتىك تاريحي-مادەني قورىق-مۋزەيى، «تۇركسوي» حالىقارالىق ۇيىمى جانە احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى مۇرىندىق بولدى.
كونفەرەنتسيا جۇمىسىنا تۇركيا، وزبەكستان، قىرعىزستان، موڭعوليا، رەسەي فەدەراتسياسى جانە وتاندىق عالىمدار مەن مۋزەي ءىسىنىڭ 30 دان اسا ماماندارى قاتىستى. كونفەرەنتسيانىڭ ماقساتى - ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى جانە «تۇركىستان- تۇركى الەمىنىڭ مادەني استاناسى» جىلى اياسىندا كيەلى جەرلەردى تانىتۋ، تاريحي-مادەني مۇرالارىمىزدى ساقتاۋ، ناسيحاتتاۋ ارقىلى كەلەشەك ۇرپاق كادەسىنە جاراتۋ، تۇركى حالىقتارىنىڭ رۋحاني ءپىرى قوجا احمەت ياساۋي مۇرالارىنىڭ تۇركى حالىقتارى تاريحىنداعى ورنى مەن ءرولى جانە وتاندىق مۋزەي سالاسىنداعى اكتۋالدى پروبلەمالاردى ساراپتاۋ، تالداۋعا ارنالعان.
«ازىرەت سۇلتان» قورىق-مۋزەيىنىڭ ديرەكتورى نۇربولات احمەتجانوۆ كونفەرەنتسيانى اشىپ، قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋ حاتىن وقىدى.
تۇركسوي حالىقارالىق ۇيىمىنىڭ وكىلى فيلولوگيا عىلىمدارىنىڭ كانديداتى، دوتسەنت، اسقار تۇرعانبايەۆ اتالعان كونفەرەنتسيانىڭ ۇلتتىق قۇندىلىقتاردى دارىپتەۋ مەن تاجىريبەنى ارتتىرۋعا ماڭىزى زور ەكەندىگىن ايتا كەلە، ياساۋي مۇراسىنىڭ ادامزات يگىلىگىنە اينالۋىنا تۇركى ەلى عالىمدارىنىڭ دا سۇبەلى ۇلەس قوساتىنىنا سەنىم ءبىلدىردى.
تۇركسوي ۇيىمى اتىنان قورىق-مۋزەي ديرەكتورى نۇربولات قادىر ۇلىنا كادەسىي تارتۋ ەتىپ، ەڭبەككە بيىك بەلەستەر تىلەدى. پلەنارلىق وتىرىسپەن باستاۋ العان باسقوسۋدا رەسەيدىڭ ونەرتانۋشىلار قاۋىمداستىعىنىڭ مۇشەسى ساتتاروۆا ليليا «تۇركسوي ي ۆزايمودەيستۆيە مۋزەيەۆ تيۋركسكوگو ميرا» تاقىرىبىندا بايانداما جاساسا، تۇركسوي حالىقارالىق ۇيىمى جانە بۋرسا مۋنيتسيپاليتەتىنىڭ قولداۋىمەن شىعارىلعان «ەۋرازيا مۋزەيلەرىندەگى كوستيۋمدەر كوللەكتسياسى» كىتابىنىڭ تۇساۋكەسەر ءراسىمىن وتكىزىپ، قورىق-مۋزەي قورىنا ءوز تارتۋىن سالتاناتتى تۇردە تابىستادى.
كونفەرەنتسياعا قاتىسۋشىلار «قوجا احمەت ياساۋي مۇراسى مەن تۇركى-يسلام وركەنيەتىنىڭ ساباقتاستىعى»، «رۋحاني جاڭعىرۋ جانە تۇركىستان»، «كيەلى، قاسيەتتى جەرلەر، مادەني تۋريزم جانە مۋزەي ءىسى» سىندى ءۇش باعىت نەگىزىندە باياندامالار وقىپ، تىڭ ويلارىن ورتاعا سالدى.
وندا قوجا احمەت ياساۋي مۇرالارىنىڭ تۇركى حالىقتارى تاريحى مەن الەمدىك وركەنيەتتەگى ورنى، زەرتتەلۋ ماسەلەلەرى، ءومىرى مەن شىعارماشىلىعى زەردەلەنىپ، سونداي-اق، وتاندىق مۋزەي سالاسىنداعى كەيبىر كوكەيكەستى ماسەلەلەر ساراپتالىپ، تالداندى.
