وڭتۇستىك قازاقستاندا تۇرمىستىق زورلىق-زومبىلىق ازايعان

شىمكەنت. قازاقپارات - وڭتۇستىك قازاقستان وبلىسىندا تۇرمىستا جاسالعان قىلمىستاردىڭ الدىن الۋ ماقساتىندا «تۇرمىس» جەدەل- پروفيلاكتيكالىق ءىس-شاراسى ءوتتى.

سونداي-اق «وتباسىنداعى زورلىق- زومبىلىقسىز قازاقستان» پيلوتتىق جوباسى اياسىندا اكسيالار ۇيىمداستىرىلدى. ناتيجەسىندە وتباسى- تۇرمىستىق سالاداعى قىلمىستار 5,9 پايىزعا تومەندەدى. بۇگىن بۇل تۋرالى و ق و وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق جەرگىلىكتى پوليتسيا قىزمەتىنىڭ باستىعى ءابدىعاني سەيدۋاليەۆ ءمالىم ەتتى، دەپ حابارلايدى قازاقپارات ءتىلشىسى.

ءابدىعاني سەيدۋاليەۆتىڭ سوزىنشە، قوعامدىق ورىنداردا جاسالعان قىلمىستار 26,4 پايىزعا، ال كوشەدە جاسالعان قىلمىستار 32,9 پايىزعا تومەندەگەن. جالپى بوتەننىڭ مۇلكىن ۇرلاۋ قىلمىستارى 12,4 پايىزعا، مال ۇرلىعى قىلمىستارى 18,8 پايىزعا كەمىگەن.

«جول-كولىك وقيعالارىن الدىن الۋ، سونداي-اق وبلىس اۆتوجولدارىندا قالىپتاسقان جەدەل جاعدايدى جاقسارتۋ، اۆتواپاتتىلىق دەڭگەيىن ازايتۋ، اۋىرتپاشىلىقتى تومەندەتۋ ماقساتىندا، اعىمداعى جىلى وبلىس اۋماعىندا «قاۋىپسىز جول»، «جاياۋ جۇرگىنشى»، «ابايلاڭىز بالالار»، «اۆتوبۋس»، «ماس جۇرگىزۋشى- قىلمىسكەر» جەدەل- پروفيلاكتيكالىق ءىس-شارالارى وتكىزىلىپ، ءوز جالعاسىن تابۋدا»، - دەدى ءابدىعاني تويشى ۇلى.

ال، پروفيلاكتيكالىق شارالاردىڭ ناتيجەسىندە وبلىس اۋماعىنداعى جولداردا ورىن العان جول كولىك وقيعالارى 5,9 پايىزعا تومەندەگەن. الايدا وبلىستىق جانە جەرگىلىكتى ماڭىزدى اۆتوجولداردا بولعان 801 ج ك و- نىڭ سالدارىنان 142 تۇلعا قازا تاۋىپ، 1133 تۇلعا ءارتۇرلى دەنە جاراقات العان.

بۇدان بولەك، تابيعاتتى قورعاۋ سالاسى بويىنشا 170 قىلمىستىق ىستەر قوزعالىپ، 624 اكىمشىلىك قۇقىقبۇزۋشىلىق جايتتەرى انىقتالعان. و ق و ءى ءى د جەرگىلىكتى پوليتسيا قىزمەتىنىڭ قۇرىلىمدارى مۇددەلى مەملەكەتتىك ورگاندارمەن بىرلەسە وتىرىپ «تابيعات»، «قىزعالداق»، «ۋىلدىرىق»، «جەر قويناۋى» سىندى الدىن الۋ ءىس-شارالارىن ۇيىمداستىرىپ كەلەدى.