ساكەن مايعازيەۆ: مەنى ەشكىم تانىمايتىن كەزدە عاشىق بولىپ، ازاماتتىعىمدى باعالاعان ايەلىمە ريزامىن

 استانا. قازاقپارات - ساكەن مايعازييەۆ وتباسىن ساقتاپ قالۋدىڭ سىرىمەن ءبولىستى. كوپ نارسەنىڭ ايەل زاتىنا بايلانىستى ەكەنىن ايتقان ءانشى ءوزىنىڭ جۇبايى ديناراعا العىسىن جەتكىزدى.

 Comode.kz-كە بەرگەن سۇحباتىندا مايعازيەۆ ايەل زاتىنا ۇنەمى كوڭىل ءبولىپ، گۇل سىيلاپ تۇرۋ كەرەك ەكەنىن ايتتى.

نازارلارىڭىزعا اتالعان سۇحباتتان ءۇزىندى ۇسىنامىز.

- ءسىزدى رومانتيك جىگىتتەردىڭ قاسىنا قوسۋعا بولادى ما؟

شىنىمدى ايتسام «رومانتيك» دەگەن ءسوزدى ۇناتپايمىن. تىزەرلەپ وتىرىپ، ساقينا سىيلاپ، ۇسىنىس جاسايتىن جىگىتتەردى، ءتىپتى، تۇسىنبەيمىن. ولار ەندى شەتەلدىڭ فيلمىنەن كورگەندى قايتالاپ جۇرگەن شىعار. ءبىراق، قازاقتىڭ ازاماتتارى ەشقاشان تىزەرلەمەگەن. ەركەك دەگەن ابىرويىنا داق تۇسىرمەگەن. مەنىڭ رومانتيك بولعىم دا كەلمەيدى. ءبىراق، ادامزاتتىڭ اسىلى پايعامبارىمىزدىڭ (س. ۋ. س) جارىنا دەگەن قۇرمەتىن، سىيلاستىعىن، جاقسى قارىم- قاتىناسىن ۇلگى ەتەمىن. ايەلىڭىزگە، اناڭىزعا، قىزىڭىزعا گۇل بەرۋ كەرەك. ءبىراق، گۇل بەرۋ ءۇشىن رومانتيك بولىپ مىندەتتى ەمەس. جانىڭىزعا جاقىن ايەل بالاسىنا گۇل سىيلاساڭىز، ولاردىڭ جۇزىندە ۇلكەن قۋانىش پەن باقىتتىڭ لەبىن بايقايسىزدار. جوعارىدا ايتىپ كەتتىم عوي، باقىتتىسەزىنۋ ءۇشىن شەتەل اسۋ قاجەت ەمەس. سول سياقتى دۇركىرەتىپ توي جاساپ، التىنعا اپتاپ، كۇمىسكە كومكەرۋدىڭ قاجەتى جوق.

«جۇبايلار بار اڭگىمەسى تاۋسىلعان.

ال، ماحاببات تاۋسىلمايتىن» - دەگەن كەرەمەت ولەڭ جولدارى بار عوي. باقىت دەگەن ول ەكى جاستىڭ بەرگەن سەرتىنەن تايماي، ءبىر- بىرىنە ادال بولىپ، سىيلاستىقتارىن ساقتاي ءبىلۋى. ال، قالعانى ۋاقىتتىڭ ەنشىسىندەگى، بۇگىن بار، ەرتەڭ جوق دۇنيەلەر.

- ءسوزىڭىزدىڭ جانى بار. الايدا، وتباسىن ساقتاپ قالۋ وڭاي ەمەس. ءسىزدىڭ شاڭىراقتارىڭىزداعى تىنىشتىق پەن سىيلاستىقتى قالاي ساقتاي الدىڭىزدار؟ قىزعانىش دەگەن بار ما؟

قىزعانىش جاس كەزىمىزدە بولعان شىعار. قازىر ءبىز اقىل توقتاتقان ازاماتتارمىز. سوندىقتان، قىزعانىش دەگەن قىزىل ءيتتى سەنىمگە جەڭدىرگەنبىز. بەرەكەلى وتباسىنىڭ باستى كەپىلى - شاريعات. «ايەلىڭنىڭ ءبىر كەمشىلىگىن كورسەڭ، بەس ارتىقشىلىعىن ەسكە ءتۇسىر. ۇنامايتىن قاسيەتىن بايقاساڭ، وزىڭە ۇنايتىن قاسيەتتەرىن ەسىڭە ال» دەيدى دىنىمىزدە. مەن جارىمدى قاتتى جوعارى باعالايمىن. مەن ءۇشىن جانىن بەرۋگە دايىن. اسىرەسە، شىعارماشىلىققا كەلگەن كەزدە العاش بولىپ قولداۋ كورسەتىپ، دەمەۋ بولاتىن جان. كەيدە «بۇل ماعان جاراسپايدى. ونى جاستار كيۋ كەرەك قوي. مەنىڭ جاسىم كەلدى» دەپ ايتا قالسام «ەرتە قارتايماڭىزشى. سىزگە كەرەمەت ۇيلەسىپ تۇر» دەپ شابىت بەرەدى.

ءومىر بولعاسىن كەيدە پسيحولوگيالىق سوققى الاتىن كەزدەرىمىز بولادى. جاقىندارىمىزدى جوعالتامىز. سەنگەن ادامداردىڭ ساتقىندىعىن كورەمىز. سول كەزدەردىڭ بارلىعىندا كەرەمەت سىرلاس دوس بولا بىلەدى. قيىندىقتى، اشتىقتى دا، توقتىقتى دا بىرگە كوردىك.

كوپ ادامدار ساكەن مايعازيەۆتى تانىپ، سوعان عاشىق شىعار. ءبىراق، مەن جارىم مايعازيەۆ ساكەنگە عاشىق بولعان جان. مەنى ەشكىم تانىمايتىن كەزدە عاشىق بولىپ، ازاماتتىلىعىمدى باعالاعان ارۋ. شاڭىراعىمىزدىڭ شايقالماي تۇرۋىنا سول كىسى بىردەن ءبىر سەبەپشى شىعار. ەر ازاماتىم دەپ قاسىم مەن قاباعىما قاراپ وتىرادى.

باقىتتى، بەرەكەلى وتباسىنا اينالۋ ءۇشىن اللانى تانىپ، قورقۋ كەرەك. مەن ءوزىمدى سۇتتەن اق، سۋدان تازامىن دەمەيمىن. ءبارىنىڭ حاققىسىن بەرۋ كەرەك. ايەلدىڭ حاقىسى بار. ەركەلەگىن كوتەرۋ كەرەك. بىرنارسە ۇناماسا كەشىرۋ كەرەك. جامان ويلاماۋ كەرەك. «ايەلدى ەرى ەمەس، ارى ۇستايدى» دەگەن ءسوز بار. ايەل ادام دا تەڭدىك وسى ەكەن دەپ توبەگە شىقپاۋى كەرەك. ءومىر بولعاسىن اق پەن قاراسى دا بولادى، پروبلەما دا بولادى. مالعۇنداردىڭ ارالاسپايتىن جەرى جوق، كەيدە سابىرسىز بولاتىن كەزىم بولادى. شۇكىر، ۇنەمى ول باسىلا قويادى. ەڭ باستىسى، كەشىرىمدى بولۋ كەرەك.