الماتى وبلىسىندا نارىنقول اۋدانى قۇرىلادى
بۇل تۋرالى الماتى وبلىسىنىڭ اكىمى اماندىق باتالوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءمالىم ەتتى.
ەسكە سالا كەتسەك، بيىل تامىز ايىندا الماتى وبلىسى ءماسليحاتىنىڭ وتىرىسىندا وبلىس قۇرامىندا اكىمشىلىك ورتالىعى نارىنقول اۋىلى بولاتىن جانە الماتى وبلىسى رايىمبەك اۋدانىنان جەر ءبولۋ ارقىلى جالپى اۋدانى 711937 گ ا بولاتىن جاڭا اۋدان قۇرۋ جونىندە ق ر ۇكىمەتىنە ۇسىنىس جاسالدى جانە جاڭا قۇرىلعان اۋدانعا «نارىنقول» اتاۋىن بەرۋ تۋرالى رەسپۋبليكالىق ونوماستيكالىق كوميسسيانىڭ قاراۋىنا ۇسىنىس جىبەرىلدى.
«ۇكىمەت قاۋلىسى مەن ەلباسى شەشىمى شىققان سوڭ، جاڭا اۋداننىڭ قۇرىلاتىنىن حالىققا قۋانىشپەن حابارلاعالى وتىرمىز. نارىنقولعا بارعاندا، جاستاردىڭ جۇمىس ىزدەپ الماتىعا اعىلعانىن كوردىك، قالادا بازار جاعالاپ جۇرگەندەرىن كوردىك. سول سەبەپتى بۇرىنعى نارىنقول اۋدانىن قايتا قۇرۋ تۋرالى ۇسىنىس جاسادىق. ەندى پروتسەدۋرالىق جۇمىستار قالدى. ازىرگە ارنايى كوميسسيا قۇرىپ، نارىنقولدىڭ عيماراتتارىن تەكسەرىپ، كەلەسى جىلدىڭ بيۋدجەتىنە جوسپار قۇرۋىمىز قاجەت»، - دەدى ا. باتالوۆ ورتالىق كوممۋنيكاتسيالار قىزمەتىندە.
ايتا كەتەيىك، الماتى وبلىسىندا 16 اۋدان بار، قايتا قۇرىلاتىن نارىنقول اۋدانى 17- بولىپ تىركەلمەك.
