ءبىز دە ادامبىز: ونەر يەلەرى جەلىدە ويىنا كەلگەندى جازاتىندارعا جاۋاپ بەردى
تىلشىگە ەكسكليۋزيۆتى سۇحبات بەرگەن تانىمالداردىڭ ءبىر توبى عالامتور تۇتىنۋشىلارىنا سابىر ساقتاپ، دورەكى سويلەمەۋگە شاقىردى. ماسەلەن، قازاقتىڭ مايراسىنا جاعىمسىز پىكىر جازاتىن بەيتانىس جانداردىڭ قاراسى كوپ ەكەن. وقىرماندارىنىڭ بۇل قىلىعىن ۇزاق ۋاقىت زەرتتەگەن ءىلياسوۆا، مىناداي شەشىمگە كەلگەن.
«ينستاگرامداعى تىڭدارماندارعا ءبىزدىڭ وكپەمىز بار. وقىرماندار ءبىلسىن، بىلمەسىن ونەر ادامدارىنا وتە دورەكى سويلەپ، قالاي بولسا سولاي جازادى. كەيدە وقىپ وتىراسىڭ عوي، اق كوڭىلىڭمەن اقتارىلىپ جاقسى ءسوز جازىپ جاتساڭ، جاعىمسىز پىكىر قالدىراتىندار كوپ. ونى كىمدەر جازاتىنىن بىلەسىز بە؟ ول جەردە كۇنى بويى جۇمىس ىستەمەي، اكە-شەشەسىنىڭ تاماعىن جەپ، ءىشىپ وتىرعان، جۇمىسى جوق سونداي ادامدار جازادى دەپ ويلايمىن»، - دەيدى مايرا ءىلياسوۆا.
ۆيرتۋالدى الەمدە ءوز وقىرماندارىنان كەرەعار پىكىردى كوپ ەستيتىن ونەر يەلەرىنىڭ ءبىرى «مۋزارت» توبىنىڭ كەنجەسى. جەلىدە ءجانابىلوۆتىڭ جانىنا باتاتىن سوزدەردى جازىپ، قىتىعىنا تيگەن عالامتور تۇتىنۋشىلارىنا ءانشىنىڭ ءوز ايتارى بار.
«ءانشىنىڭ جەكە ءومىرىن تالقىلاعاندار ءبىلىمى تايازدار دەپ ايتقىم كەلەدى. جاڭاعى، بولماشى نارسەگە بالە ىزدەيتىندەر. قازىر جۇرتقا جاعۋ قيىن عوي. بىردەڭە سالىپ جاتساڭ، بىرەۋ بىردەڭە دەپ جاتادى. سودان كەيىن سول جەردە ءبىر-بىرىمەن قىرىلىپ جاتاتىن ادامدار دا بولادى. سوندىقتان، وعان ءمان بەرمەۋگە تىرىسامىن»، - دەيدى كەنجەبەك ءجانابىلوۆ.
وقىرماندارىمەن ءجيى شايقاسقا شىعاتىن جۇلدىزداردىڭ ءبىرى شاحيزادا! ءار قادامىن جەلىگە جۇكتەپ، اككاۋنتى ارقىلى ءدۇيىم جۇرتقا اقپارات تاراتاتىن ءانشىنى سىنايتىنداردىڭ سانىندا شەك جوق بولىپ شىقتى.
«نەگىزى ءارتىس تە ادام عوي. ولار دا سۇيەك پەن ەتتەن جارالعان. ءبىز دە ەركەلەپ، قايدا جۇرگەنىمىزدى، نە جەپ جاتقانىمىزدى، اسحانادا جۇرگەنىمىزدى جانە بالالارمەن قىدىرىپ جۇرگەنىمىزدى سالعىمىز كەلەدى. سوندىقتان، جاعىمسىز پىكىر جازىپ، جۇرەكتى اۋىرتۋعا بولمايدى دەپ ويلايمىن»، - دەيدى ءانشى شاحيزادا.
