بيشىمبايەۆ ءىسى بويىنشا ايىپتالعاندار كىناسىن «مويىنداي» باستادى
بۇل تۋرالى 31- قازاندا استاناداعى مامانداندىرىلعان اۋدانارالىق قىلمىستىق ىستەر سوتىندا وتكەن الدىن الا تىڭداۋدا بەلگىلى بولدى.
قىلمىس جاساعانىن جانە ونىسىنا وكىنەتىنىن ايتقان ايىپتالۋشىلاردىڭ ءبىرى - «بايتەرەك DEVELOPMENT» اكتسيونەرلىك قوعامى باسقارما باسشىسىنىڭ بۇرىنعى ورىنباسارى اسلان جاقىپوۆ. وعان قىلمىستىق كودەكستىڭ 366-بابى، 4- ءبولىمى بويىنشا «پارا الۋ» ايىبى تاعىلعان. جاقىپوۆتىڭ پروكۋرورلارمەن كەلىسىمگە كەلۋگە نيەتتى ەكەنىن سوت بارىسىندا ادۆوكاتى گالينا ءالىمعوجينا ايتتى.
«قورعاۋىمىزداعى اسلان جاقىپوۆتىڭ ۇستانىمى بۇعان دەيىن سويلەگەندەردىڭ ۇستانىمىنان وزگەرەك. اسلان جاقىپوۆ 2016-جىلدىڭ 17- قاراشاسىندا ۇستالعان. سودان بەرى كىناسىن مويىنداپ، تولىق كۋالىك ەتىپ كەلەدى»، - دەدى ادۆوكات سۋدياعا.
جاقىپوۆتان بولەك كىناسىن مويىنداپ، پروكۋرورلارمەن كەلىسىمگە كەلۋگە نيەتتى تاعى دا ءتورت ايىپتالۋشى بار.
ال قۋاندىق بيشىمبايەۆ وزىنە تاعىلعان ايىپتى مويىندامايدى. بۇرىنعى ۇلتتىق ەكونوميكا ءمينيسترى مەن جانىنداعى جيىرما ەكى ادامعا «نۇرلى جول» باعدارلاماسى بويىنشا سالىنعان ۇيلەردىڭ قۇرىلىسىن جۇرگىزۋگە بايلانىستى كومپانيالاردان ءىرى كولەمدە پارا الدى دەگەن ايىپ تاعىلعان.
قۋاندىق بيشىمبايەۆ 2016-جىلى ۇلتتىق ەكونوميكا ءمينيسترى قىزمەتىن سەگىز اي اتقارعان. بۇگىندە ول استانا قالالىق ىشكى ىستەر دەپارتامەنتىنىڭ ۋاقىتشا قاماۋ يزولياتورىندا وتىر. 2017-جىلدىڭ 10-قاڭتارىندا ول «توپ بولىپ الدىن الا ءسوز بايلاسۋ ارقىلى اسا ءىرى كولەمدە بىرنەشە رەت پارا الۋ فاكتىسى» بويىنشا ۇستالعان ەدى.
تەرگەۋ بارىسىندا بيشىمبايەۆتىڭ قاماۋ مەرىزىمى بىرنەشە رەت ۇزارتىلعان. تەرگەۋ ءىسى 10 ايعا دەيىن جالعاستى. قىلمىستىق ءىس 250 تومعا جەتكەن. 23 ايىپتالۋشىنىڭ ءارقايسىندا كەمىندە ەكى ادۆوكاتتان بار.
