اباي بەگەي شەتەلدىك انشىلەرگە قىرۋار قارجى تولەيتىن توي يەلەرىنە رەنجىپ قالدى

استانا. قازاقپارات - توي - انشىلەردىڭ نەگىزگى تابىس كوزى. بۇگىندە ونەر يەلەرى تويسىز كۇنىن كورە المايدى.

الايدا كەيبىر توي يەلەرى قازاقستاندىق ەمەس، شەتەلدىك انشىلەردى شاقىرعاندى ءجون كورەدى. بۇل جايت وتاندىق انشىلەردىڭ شامىنا ءتيىپ وتىر.

ايتۋلارىنشا، رەسەيلىك ءبىر انشىگە تولەنەتىن سومماعا قازاقستاندىق 5-6 ءانشىنىڭ قالاماقىسىن وتەۋگە بولادى.

بۇل تۋرالى 31-ارنانىڭ «ايتا بەرسىن» باعدارلاماسىندا ايتىلدى.

«رەسەيلىك باسكوۆتى كوپ كورەم، تامادا بولعان كەزدە 5-6 رەت كوردىم. مەلادزە سوڭعى كەزدە 3 رەت كەلىپ كەتتى. تيماتي كەلەدى، ءبىراز انشىلەر كەلەدى. تەك قانا رەسەيدەن ەمەس، وزبەكستاننان «ياللا»، يۋلدۋز ۋسمانوۆا كەلەدى. ال ءبىزدىڭ قازاقستاننىڭ انشىلەرى شەتەلگە تويعا، كونتسەرتكە بارا المايدى. ءتىپتى، رەسەيگە دە بارا المايدى. كوپ بولسا قىتايعا، وزبەكستاننىڭ شەت جاعىنا بارىپ كەلەتىن شىعارمىز. ودان ءارى اسا المايمىز. سەبەبى قازاقتىڭ اندەرى ول جاقتا تىڭدالمايدى»، - دەگەن اباي بەگەي شەتەلدىك انشىلەرگە ميلليونداپ اقشا تولەيتىن توي يەلەرىنە رەنىشىن جەتكىزدى.

ارىپتەسىنىڭ ءسوزىن ءانشى نۇرلان البان دا قوشتاي ءتۇستى.

«الىس-جاقىن شەتەلدەگى انشىلەردى شاقىرىپ جاتاتىنى وتىرىك ەمەس. دەسەك تە ءبىر اتتەگەن-اي بار، سول شەتەلدەن كەلىپ جاتقان ءانشىنىڭ الىپ جاتقان سىياقىسى قانشالىقتى جوعارى دەڭگەيدە؟! ال شىنتۋايتىنا كەلگەندە سول اقشاعا شەتەلدىك انشىلەردى شاقىرماي-اق، ءبىزدىڭ الدىڭعى تولقىن، بىزگە جول باستاپ جۇرگەن اعالارىمىز بەن اپالارىمىزعا ءبولىپ بەرسە، ەشكىمنىڭ رەنىشى بولمايتىن ەدى. ەگەر دە مەنىڭ اقشام كوپ بولسا، تەگىن ەمەس، جالىنىپ، جالپايىپ، بيبىگۇل اپايىمىزدى ميلليون، ميلليارد بەرىپ، تويعا شاقىرار ەدىم. قاراجاتىم كوپ بولسا، «دوس- مۇقاساندى»، نۇرعالي اعامدى، ەسكەندىر اعامدى قالدىرماس ەدىم. روزا، مايرا اپالارىمدى، ماقپال جەڭگەلەرىمدى شاقىرار ەدىم. سول تويدىڭ باسى-قاسىندا ءجۇرىپ، مەنىڭ ءىشىم اشيتىنى راس»، - دەپ اتاپ ءوتتى نۇرلان البان.

الايدا ايقىن قازاقستاندىق انشىلەردىڭ گونورارى(تويدا الاتىن اقشاسى) اۋديتورياسىنا ساي دەپ، ونەردەگى اعالارىمەن كەلىسپەيتىنىن جەتكىزدى.

«ەندى ولاردىڭ اۋديتورياسى 100 ميلليون، 200 ميلليون. ونىمەن سالىستىرعاندا بىزدە 15 ميلليون، تىپتەن سالىستىرۋعا كەلمەيدى. سوندىقتان وعان ەش رەنجۋدىڭ قاجەتى جوق. بىزدە گونوراردىڭ باعاسى كونكۋرەنسياعا بايلانىستى قويىلادى. باسقا انشىلەردە قالاي بولسا، سوعان قاراپ قوياسىڭ»، - دەپ اتاپ ءوتتى ول.