قانات يسلام چەمپيوندىق اتاققا تالاسا الا ما؟
ەندى ۇيىمنىڭ چەمپيوندىق اتاعىنا تالاس قالاي جالعاسادى؟ بۇل جايىندا Vesti.kz سايتىنىڭ ءتىلشىسى امەريكالىق كوممەنتاتور ءارى Delcotimes.com سايتىنىڭ ءتىلشىسى دجەك ماككافەرريدەن سۇراپ كورگەن ەكەن.
- ەريسلاندي لارا سالماق دارەجەسىن كوتەرمەيتىن سەكىلدى. بۇل قانات ءۇشىن قۋانىشتى حابار ەمەس. كەلەر جىلى WBA چەمپيوندىق بەلبەۋىن لارا مەن كاستانو ساراپقا سالاتىن بولادى. جەكپە-جەكتىڭ جەڭىمپازى قايتپاس قايسار قازاق بوكسشىسىمەن جۇدىرىقتاسۋعا كەلىسە قويادى دەپ ويلامايمىن. سەبەبى يسلامدى ا ق ش- تا كوپشىلىك تاني بەرمەيدى. سوندىقتان كەزدەسۋدەن تۇسەتىن تابىس از بولادى.
چەمپيوندىق اتاققا يە بوكسشى رەيتينگتە ۇزدىك 30 بوكسشىنىڭ ءبىرىن تاڭداي الاتىنىن دا ەسكەرە كەتكەن ءجون. وسىنىڭ سالدارىنان يسلام سەكىلدى كەلەشەگى بار كوپ بوكسشىلار تانىلا الماي ءجۇر.
قاناتتىڭ بۇل تىعىرىقتان شىعار ءبىر جولى بار. كەز كەلگەن بوكسشىعا قوماقتى گونورار ۇسىنساڭ، جەكپە-جەكتەن باس تارتپاۋى مۇمكىن. ەگەر يسلامنىڭ كومانداسى بىرنەشە ميلليون دوللار تاۋىپ، ۇسىنىس جاساسا، ءتىپتى چەمپيونمەن قازاقستاندا جەكپە-جەك وتكىزۋگە دە بولادى، - دەيدى ماككافەرري.
ايتا كەتەيىك، امەريكالىق بوكسشى دەمەتريۋس اندرادە سالماق اۋىستىرعاننان كەيىن WBA تۇراقتى چەمپيوندىق اتاعىن ارگەنتينالىق بوكسشى برايان كاستانو يەلەنگەن ەدى. ءدال وسى بوكسشى قانات يسلامنىڭ قارسىلاسى اتانۋى مۇمكىن ەكەنى ايتىلعان.
وسىعان دەيىن قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكو قازىرگى جاعداي قانات يسلامنىڭ پروموۋتەرلەرىنە تىكەلەي بايلانىستى ەكەنىن ايتقان. FightSpace جوباسىنىڭ نەگىزىن قالاۋشى گريگوري سترانگريت بوكسشىنىڭ كومانداسى ءۇشىن تاماشا مۇمكىندىك كەلىپ تۇرعانىن العا تارتقان ەدى.
ال جاقىندا قانات يسلام 22- ناۋرىز كۇنى الماتىدا ايگىلى فيليپپيندىك بوكسشى مەنني پاكياومەن جەكپە-جەك وتكىزۋى مۇمكىن دەگەن دە جاڭالىق شىققان. الايدا بۇل جەكپە-جەكتى ۇيىمداستىرىلۋىنا كۇمانمەن قاراعاندار قاراسى كوپ بولدى. نە دە بولسا قازاقتىڭ ابىرويىن اسىرىپ جۇرگەن قاناتتىڭ سپورتتىق مانسابىنا تابىس تىلەيمىز.
