ارقادا قۇلان ءوسىرۋ ءىسى قولعا الىندى

قوستاناي. قازاقپارات - بيىل قوستاناي وبلىسىنىڭ جانكەلدين اۋدانىنا بىرنەشە قۇلان اكەلىنگەن. ءتۇز تاعىلارىنىڭ قىستاپ شىعۋى ءۇشىن ارنايى ورىن دايىندالدى، دەپ حابارلايدى قازاقپارات ءتىلشىسى.

جىل باسىنان باستاپ جانكەلدين اۋدانىنا 9 قۇلان ارنايى تىكۇشاقپەن جەتكىزىلدى. ولاردى «التىن دالا» مەملەكەتتىك تابيعي رەزەرۆاتى قاراۋىنا الدى. سونداي-اق، دالانى قورعاۋعا ىرعىز- تورعاي رەزەرۆاتى ينسپەكتورلارى، ساعا، التىباي اڭشىلىق شارۋاشىلىقتارىنىڭ يەگەرلەرى، تابيعاتتى قورعاۋ پوليتسياسى جاۋاپ بەرەدى.

«بۇگىندە قۇلانداردىڭ بەيىمدەلۋى ءۇشىن اۋماقتان 55 گەكتار جەر قورشالدى. ولار سوندا قىستاپ شىعادى. كوكتەمدە سىرتقا شىعارىلادى. جانكەلدين اۋدانى ءتۇز جانۋارلارىن وسىرۋگە وتە قولايلى ءوڭىر. اڭداردىڭ مويىندارىنا ەلەكتروندى قارعى تاعىلىپ، ولار سپۋتنيك ارقىلى باقىلاۋعا الىنعان»، - دەدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى عيلىمحان مولداعۇلوۆ.

ءتۇز اڭدارىن اكەلۋ مەن ءوسىرۋ شارالارى 2017-2020 -جىلدار ارالىعىندا ەكى كەزەڭ بويىنشا جۇزەگە اسىرىلادى. 2018 -جىلى 16، ودان كەيىنگى جىلى تاعى 16 ساياقتى جانۋار اكەلىنەدى.

قوستانايعا قۇلاننان بولەك، پرجەۆالسكي جىلقىلارى دا كەلەدى. سەبەبى، كەرقۇلاندار دەپ اتالاتىن جىلقىنىڭ بۇل جابايى ءتۇرى وتكەن عاسىرلاردا قازاقستان اۋماعىن، سونىڭ ىشىندە تورعاي دالاسىن دا مەكەن ەتكەن ەكەن.

عيلىمحان مولداعۇلوۆتىڭ سوزىنشە، قارجىلاي قولداۋ تابىلىپ جاتسا، پرجيەۆالسكي جىلقىلارى بايىرعى قونىسىنا قايتا ورالادى.