ءجۇزجىلدىق كۇبىنىڭ شيپالى قىمىزى
وسىدان ءبىراز بۇرىن اۋدانعا جولىمىز تۇسكەندە، تاريحتىڭ تالاي سىرىن كەۋدەسىنە بۇعىپ جاتقان قارت الاتاۋدىڭ قايقى اسۋىندا تىگىلگەن اقشاڭقان كيىز ۇيگە ەنىپ، ءدام تاتتىق. سان جولاۋشى ات باسىن بۇرىپ، ءبىر ءسات مەيىرى قانا ءشول باسار بۇل قازاق ءۇيىن كوپشىلىك «ءشاربات» قىمىزحاناسى دەپ اتايدى ەكەن. قىمىزى تاڭدايدا ءدامىن قالدىراتىن بولعاندىقتان اتاۋى سولاي شىعار دەپ جورامال جاساعان جاندار - وسىناۋ جول ۇستىندە ورنالاسقان، كوكتەمنەن كۇزگە دەيىن جولاۋشىلاردىڭ اپتىعىن باسار، قازاقتىڭ ۇلتتىق تاعامدارى مەن سۋسىندارىنان ءدام تاتار قۇتحانانىڭ قۇتىن قاشىرماي وتىرعان قوجايىننىڭ ەسىمى دە ءشاربات ەكەنىن ەستىگىندە ءبىر جاراسىمدىلىقتى بايقاپ، جىلى جىميادى.
اۋدانعا ات باسىن بۇرعان جولاۋشى مەن جەرگىلىكتى حالىقتىڭ قايقى اسۋىندا ايالداپ، تاماعىن جىبىتەر قىمىزدىڭ بال تاتۋىنىڭ دا وزىندىك سەبەبى بار. ونىڭ قۇپياسى - قاسيەتتى كۇبىدە.
جۇزىنەن شۋاق توگىلىپ تۇراتىن ءشاربات تايلىبەكوۆا اڭگىمە بارىسىندا كۇبىنىڭ سىرى كەتسە دە سىنى قايتپاي ساقتالعانىنا 100 جىل بولعانىن ايتتى.
- قىمىزحانانى اشقانىما 8 جىل. وسى ۋاقىتتا كوپشىلىكتىڭ العىسىنا بولەنۋدىڭ، قىمىزدىڭ ءدامدى بولىپ، الۋشىلاردىڭ كۇن سايىن ۇزىلمەي كەلۋىنىڭ ءبىر سىرى وسى ءبىر عاسىرلىق كۇبىدە جاتىر. مۇنى اتام ءجۇنىس شاح ۇلى قاراعاشتان شاۋىپ جاساپتى. كەزىندە سىرتى ىشەكپەن قاپتالىپ، ارلەنگەن ەكەن. قازىر جاڭا تالاپقا ساي سىرتىن ادەمىلەپ بوياپ قويدىق. نەگىزىنەن، بۇل كۇبىدە پىسكەن قىمىزعا حالىقتىڭ سۇرانىسى جوعارى، - دەگەن قىمىزحانا يەسى ءجۇز جىلدىق كۇبىنى سات دەپ قولقا سالۋشىلاردىڭ دا از ەمەس ەكەندىگىن ايتا كەتتى. «سىرلى اياقتىڭ سىرى كەتسە دە، سىنى كەتپەيدى» دەمەكشى، مەن مۇنى اتامنىڭ كوزى رەتىندە ارتىنداعى ۇرپاعى باعالاپ ءجۇرسىن دەگەن نيەتپەن ساتپادىم» دەپ اعىنان جارىلدى.
مامىر- قازان ايلارى ارالىعىندا جۇمىس جاسايتىن «ءشاربات» قىمىزحاناسىنان قىمىزبەن قاتار، ۇلتتىق اس ءمازىرىنىڭ بارلىعى دا تابىلادى. دەگەنمەن ءبىر عاسىر بويى ساقتالعان كۇبىدەن تامعان اق ءناردىڭ ءجونى بولەك.
بولات اباعان، الماتى وبلىسى
«ايقىن»
