اتىشۋلى گۇلنار كارىموۆا جاقىن كۇندەرى تاعى دا سوتقا تارتىلماقشى
وزبەكستاننىڭ ەكس-پرەزيدەنتى يسلام كارىموۆتىڭ باسىنان باق تايعان قىزى تۋرالى جاڭا دەرەكتەر شۆەيتساريا پروكۋراتۋراسىنىڭ ەل ۇكىمەتىنە جولداعان ساۋالىنان سوڭ انىقتالىپ وتىر.
سەبەبى، شۆەيتساريانىڭ فەدەرالدىق پروكۋرورى كەلەسى اپتادا تاشكەنتكە كەلىپ، گۇلنارمەن جولىعۋدى جوسپارلاعان ەكەن. ءبىراق وزبەكستاننىڭ قۇزىرلى ورىندارى ءوتىنىشتىڭ ورىندالمايتىنىن، ويتكەنى جاقىن ارادا كارىموۆانىڭ ىسىنە قاتىستى سوت وتىرىسى باستالاتىنىن ايتىپتى.
ەستەرىڭىزگە سالساق، وسىدان بەس جىل بۇرىن شۆەيتساريادا سىبايلاس جەمقورلىق پەن اقشا جىمقىرۋعا قاتىستى قىلمىستىق ءىس قوزعالىپ، وزبەكستاننىڭ التى ازاماتى كۇدىككە ىلىنگەن.
سول داۋ بارىسىندا كارىموۆانىڭ دا شۆەيتساريالىق بانكتەگى 800 ميلليون دوللاردان استام قارجىسى بۇعاتتالعان ەدى.
سونداي-اق وتكەن جازدا وزبەكستاننىڭ باس پروكۋراتۋراسى مارقۇم پرەزيدەنتتىڭ قىزىن قارجى جىمقىرۋ مەن بوپسالاۋعا قاتىسى بار دەپ، بەس جىلعا باس بوستاندىعىن شەكتەگەن بولاتىن.
