قىتايلىق رەسەيدەن التىن قۇيمالاردى زاڭسىز الىپ وتپەك بولدى

استانا. قازاقپارات - رەسەيدىڭ شەكاراسىنان قۇنى 8 ميلليون رۋبلدەن اساتىن التىندى زاڭسىز الىپ وتپەكشى بولعان قىتاي ازاماتىنىڭ جولى كەسىلدى.

بۇل تۋرالى رەسەي سولتۇستىك ءسىبىر كولىك پروكۋراتۋراسىنىڭ رەسمي سايتى حابارلادى.

2017-جىلعى 7- قازان كۇنى رەسەيدىڭ بلاگوۆەشەنسك كەدەن بەكەتىندە 1981-جىلى تۋعان قىتاي ازاماتىن تەكسەرۋ كەزىندە ۇلتاراعىنان كەدەن قاعازىندا كورسەتىلمەگەن 4 دانا قۇيما التىن تابىلعان.

ساراپشى مامانداردىڭ قورىتىندىسى بويىنشا، زاڭسىز جولمەن اكەتپەك بولعان التىننىڭ سالماعى 3680 گرام. باعالى بۇيىمنىڭ جالپى قۇنى رەسەي ۆاليۋتاسىمەن 8666878 ءرۋبلدى قۇراعان.

اتالعان وقيعاعا بايلانىستى رەسەي قىلمىستىق كودەكسىنىڭ 226.1-بابىنىڭ 1-بولىگىنە سايكەس قىلمىستىق ءىس قوزعالدى. تەرگەۋ امالدارى ءجۇرىپ جاتىر.