لاتىن ءالىپبيى قازاق ءتىلىن وركەنيەتتى الەمنىڭ ماڭىزدى بولىگى رەتىندە قالىپتاستىرادى

استانا. قازاقپارات - «قازاقستان-2050» جالپى ۇلتتىق قوزعالىسى قازاق ءتىلىنىڭ لاتىن الىپبيىنە كوشۋىنە قولداۋ كورسەتىپ، ارنايى ۇندەۋ جاريالادى.

قازاقپارات وقىرمان نازارىنا اتالعان ۇندەۋدى ۇسىنادى.

«ءبىز تاريحي ءساتتى باستان وتكىزىپ وتىرمىز. مەملەكەت باسشىسى نۇرسۇلتان نازاربايەۆتىڭ قازاق ءتىلىن لاتىن الىپبيىنە كوشىرۋ تۋرالى جارلىعىن وتانىمىزدىڭ تاريحىنداعى اسا ماڭىزدى قۇجات دەپ سانايمىز. «قازاقستان 2050» جالپى ۇلتتىق قوزعالىسى ەلباسىنىڭ بۇل باستاماسىن قولدايدى جانە ونى جارقىن بولاشاقتىڭ كەپىلى دەپ بىلەدى.

ءبىز قازاق ءتىلىنىڭ لاتىن الىپبيىنە كوشۋى مەملەكەتتىڭ دامۋىنا وڭ اسەرىن تيگىزەتىنىنە سەنىمدىمىز. لاتىن ءالىپبيى كوپتەگەن ءتىلدىڭ ءالىپبيى رەتىندە قالىپتاستى. ونىڭ ىشىندە تۇركىتىلدەس ەلدەر دە بار.

سوندىقتان بۇل ءالىپبي ءوزىنىڭ تيىمدىلىگى مەن وزەكتىلىگىن كورسەتىپ وتىر. لاتىن ءالىپبيى بۇگىنگى كۇنى ميلليونداعان ادامنىڭ ورتاق مۇراسىنا اينالدى. ونداعان تۋىسقان ەل وسى ءالىپبي ارقىلى وزدەرىنىڭ بىرلىگىن نىعايتىپ وتىر. ءبىز، «قازاقستان-2050» جالپى ۇلتتىق قوزعالىسى، لاتىن ءالىپبيى قازاق ءتىلىن وركەنيەتتى الەمنىڭ ماڭىزدى بولشەگى رەتىندە قالىپتاستىراتىنىنا، لاتىن ءالىپبيىن قولداناتىن ەلدەرمەن بايلانىسىمىزدى ودان ءارى نىعايتا تۇسەتىنىنە سەنىمدىمىز.

لاتىن ءالىپبيى تۋرالى وسى ۋاقىتقا دەيىن ءبىراز ايتىلدى، ياعني، بۇل ءالىپبي تەحنولوگيالىق دامۋ ۇدەرىسىندە، حالىقارالىق دەڭگەيدە بايلانىس ورناتاتىن تىلدەردىڭ وزەگى رەتىندە قالىپتاسقانىن جاقسى بىلەمىز.

قازىرگى ۋاقىتتا باعدارلامالاۋدىڭ بارلىق جۇمىسى وسى لاتىن ءالىپبيىنىڭ نەگىزىندە جاسالادى. وسىنىڭ بارلىعى ءبىزدىڭ ەلىمىز ءۇشىن ماڭىزدى جانە لاتىن ءالىپبيى بىزگە دە قىزمەت ەتۋى ءتيىس. مەملەكەت پەن ۇلتتىڭ دامۋىنىڭ باستاۋىندا وسىنداي ماڭىزدى قادامنىڭ بولۋى - ۇلى ءىس. لاتىن الىپبيىنە كوشۋ ماسەلەسى «قازاقستان-2050» ستراتەگياسىنىڭ ماڭىزدى بولىگىنە اينالۋى تەگىن ەمەس، ءتىل - بىزگە اينالانى تانىپ، ءوزىمىزدى دامىتا ءتۇسۋ ءۇشىن قاجەت.

سوندىقتان، مەملەكەتتىڭ مۇددەسى مەن باسىمدىقتارىن ەسكەرە وتىرىپ، بارلىق ازاماتتىڭ جۇمىلىپ، كۇش بىرىكتىرەتىن ۋاقىتى كەلدى.

«قازاقستان 2050» جالپىۇلتتىق قوزعالىسى قازاق ءتىلىنىڭ لاتىن الىپبيىنە كوشۋ يدەياسىن قولداۋ ارقىلى، ءتىلدى ۇلتتى بىرىكتىرەتىن باستى فاكتور رەتىندە تۇسىنەتىندىگىن جەتكىزگىسى كەلەدى. ءبىز الداعى ۋاقىتتا ءاربىر قازاقستاندىقتىڭ قازاق ءتىلىنىڭ لاتىن الىپبيىنە كوشۋىن ماڭىزدى قادام رەتىندە باعالاپ، ۋاقىت وتكەن سايىن ونىڭ قىمبات قۇندىلىق ەكەنىن تۇسىنەتىنە سەنەمىز»، - دەلىنگەن ۇندەۋدە.

اۆتور: مارلان جيەمباي