قول كۇرەسىنەن اشىق ازيا كۋبوگىنان باتىس قازاقستاندىقتار ولجالى ورالدى

ورال. قازاقپارات - تاراز قالاسىندا قول كۇرەسىنەن وتكەن اشىق ازيا كۋبوگى جارىسىنان باتىس قازاقستاندىق سپورتشىلار ولجالى ورالدى، دەپ حابارلايدى «قازاقپارات» ءتىلشىسى.

قول كۇرەسىنەن ب ق و قۇراماسىنىڭ اعا جاتتىقتىرۋشىسى مۇرات يباتوۆتىڭ ايتۋىنشا، اتالمىش جارىسقا رەسەي، لاتۆيا، بولگاريا، حورۆاتيا، ءۇندىستان، جاپونيا، قىرعىزستان، تاجىكستان، وزبەكستان، يران، گەرمانيا، گرەكيا، چەحيا، قازاقستان، بارلىعى 14 ەلدەن 400 سپورتشى قاتىسىپ، باق سىنادى.

مۇمكىندىگى شەكتەۋلى جاندار اراسىندا ارم-1 (مۇگەدەك ارباسىندا وتىراتىندار) توبىندا باتىس قازاقستاندىق ازون شايماردانوۆ 75+ كەلى سالماقتا قارسىلاس شاق كەلتىرمەي، چەمپيون اتاندى.

53 جاستاعى ازون شايماردانوۆ ەكىنشى توپتاعى مۇگەدەك بولعانىنا قاراماستان، بىرنەشە سپورت تۇرىمەن دەندەپ اينالىسۋمەن بىرگە مۇمكىندىگى شەكتەۋلى جاندارعا ارنالعان سپورت كلۋبىندا اعا باپكەر بولىپ قىزمەت ەتەدى.

ول - وتىرىپ ۆولەيبول ويناۋدان سپورت شەبەرى، سونداي-اق پاۋەرليفتينگتەن حالىقارالىق دارەجەدەگى سپورت شەبەرى. قول كۇرەسىنەن 2016-جىلى تاشكەنتتە جانە بيىل قىرعىزستاندا وتكەن ازيا بىرىنشىلىگىندە قوس قولا مەدالدان يەلەنگەن ازون شايماردانوۆ ەندى، مىنە، چەمپيوندىق اتاققا قول جەتكىزىپ وتىر.

اشىق ازيا كۋبوگىندا سول سەكىلدى ورالداعى 4№ بالالار-جاس وسپىرىمدەر سپورت مەكتەبىنىڭ تاربيەلەنۋشىلەرى كەنجەقىز قاۋپەنوۆا جاستار اراسىندا 65 كەلى سالماقتا، ايەلدەر اراسىندا اسەل جۇماعامبەتوۆا 80 كەلىدە ەكىنشى، ال جاننا قازتۋعانوۆا 55 كەلىدە ءۇشىنشى ورىنعا كوتەرىلدى.

بۇل سپورتشىلاردىڭ جەكە باپكەرى - مۇرات يباتوۆ. تاعى ءبىر ورالدىق جاس سپورتشى انەل الشىنوۆا جاس وسپىرىمدەر اراسىندا 55 كەلى سالماقتا قولا جۇلدەگە ىلىكتى. ونىڭ باپكەرى - راۋان امانگەلديەۆ.

اۆتور: ەلجان ەرالى