قۇسبەگىلىكپەن اينالىسقان اعايىندى بالالار قۇس باپتاۋدىڭ سىرىن ايتتى

 استانا. قازاقپارات - سەيدوللا جانە تولەمىرزا كەۋەنوۆتەر «جاڭا كۇن» باعدارلاماسىندا قوناق بولىپ، قۇسبەگىلىكتىڭ قىر- سىرىن ايتىپ بەردى.

 بۇل تۋرادى otyrar.kz حابارلايدى.

  - سوناۋ قاسقاسۋدان كەلىپ وتىرسىڭدار. ۇيدە جەتى بىردەي قىران قۇس بار ەكەن. قايسىسىن الىپ كەلىپ وتىرسىڭدار ستۋدياعا؟

-  ستۋدياعا اقيىق اتتى قۇستى الىپ كەلىپ وتىرمىز. بۇركىتتەردىڭ ىشىندەگى ۇلكەنى، سەنىمدى، ەرەكشە قاسيەتكە يە. ال ەكىنشىسى قارشىعانىڭ ءبىر ءتۇرى، ونىڭ ىشىندە تۇيعىن دەپ اتالادى. كوپ جەردە كەزدەسپەيدى. ءبىر تۇلەك كەزىندە تاۋدان ۇستاعانبىز.

  - ارنايى ەرەجە بويىنشا باپتايسىڭدار ما؟

-   تاڭەرتەڭ قۇسقا جەم بەرەمىز. ساباقتان قايتقان سوڭ ۇشتە جاتتىعۋعا اپارامىز. ءبىرىنشى اتپەن قولعا شاقىرامىز، شىرعاعا سالامىز، تۇلكىگە سالامىز. ارنايى جاتتىعۋ جاساتامىز. ارى- بەرى ۇشىرامىز. قۇستىڭ كوڭىل- كۇيىنە قارايمىز. جارىستىڭ الدىندا ولارعا ءسال ازىراق ەت بەرەمىز. سۋ ارالاستىرىپ.

- كۇتىمى قالاي بولادى، تۇرىپ قالعان ەتتى بەرۋگە بولمايدى دەيدى...

- تازا ەتتى جۋىپ بەرەمىز. جازدىڭ كۇنىندە تۇلەكتە وتىرعاندا 1 كەلىگە دەيىن ەت جەيدى. ال ءقازىر قولدا وتىرعاندا 200 گرامم جەيدى. بابىندا وتىرادى. تۇزدى ەت بەرۋگە بولمايدى. ءولىپ قالۋى مۇمكىن.

  - قۇس وتىراتىن ارنايى قولعاپ بولادى عوي...

- بۇنى بيالاي دەپ اتايدى. ونى قايىستان جاسايدى. جەمىن دە وسىمەن بەرەمىز. قولعا دا تىرناقتارى كىرىپ كەتپەيدى. باسىنداعى ارنايى قالپاق توماعا دەپ اتالادى. بۇركىت ەلەڭدەپ ۇشا بەرمەيدى. ءبىرقالىپتى تىنىش وتىرادى. ادامعا دا ىڭعايلى. جەڭىل كوتەرىپ جۇرۋگە بولادى. جاتتىعۋ كەزىندە كوزىندەگى توماعاسىن سىپىرامىز. اياقتارىنداعى باۋ دەپ اتالادى. بايلاپ قويامىز، قاشپايدى.
-    ارنايى ۇستەلتاقتى قايدان الدىڭدار؟

 - ارنايى تاپسىرىسپەن جاساتتىق.

-  جاسى قانشادا؟

- ءالى بالاپان، جاسقا تولعان جوق.

-  ساياتشىلىققا شىقتىڭدار ما؟

- 7-8 جاسىمىزدان بەرى قۇسبەگىلىكپەن اينالىسامىز. اكەممەن بىرگە قىستىڭ كۇندەرى ساياتشىلىققا شىعامىز.

- قارشىعا مەن بۇركىتتىڭ ايىرماشىلىعى بار ما؟

 - تۇيعىن بۇركىت سياقتى 200 گرامم جەم جەمەيدى. تويعىزىپ بەرىپ تۇرۋ كەرەك. از بەرسەڭ ءولىپ قالۋى مۇمكىن.

  - ۇياسى جونىندە ايتىپ وتسەڭدەر...

- تاۋلى جەرلەردە جارتاستارعا، قۇزعا سالادى.

- ءتۇز تاعىسىن ۇستاۋ ءۇشىن جەمساۋىن تولتىرماي ۇشىرادى دەيدى..

- ءيا، راس. ويتكەنى جەمىن الدىن الا بەرىپ قويساڭ ول وزىڭە كەلمەيدى. قاشىپ ۇشىپ كەتۋى مۇمكىن...

- ساياتشىلىققا قاي كەزدە شىعادى؟

- قىستا، سۋىق كەزدە، قۇس بابىندا تۇرعان كەزدە شىعامىز. ءبىر تويعاننان كەيىن قۇس قايتا- قايتا جەي بەرمەيدى. ساياتشىلىققا ەكى بۇركىتتى الىپ شىعامىز. تۇلكى، قارساق الامىز. كەزىككەن اڭعا سالامىز. بۇيىرعانىن الامىز. بىلتىر قاسقاسۋدىڭ تاۋ بوكتەرىندە قاسقىرعا كەزىكتىك. ءبىراق بۇركىت كۇشى جەتپەي الا المادى. بابىنا قاراي الادى عوي. قاسقىر دا كۇشتى بولعان. الدىڭعى اياعىمەن بۇركىتتىڭ تىرناعىن قايىرىپ قاشىپ كەتتى. ءبىر بۇركىت ءبىر كۇندە ەكى ءۇش اڭدى الۋعا قاۋقارلى.

- اكەلەرىڭ قۇسبەگى جومارت كەۋەنوۆتى بۇكىل اۋىلعا عانا ەمەس ەلىمىزگە دە تانىمال... اڭدى الۋعا ادۋىندى ەتىپ باپتاۋدىڭ سىرى نەدە؟

- ءار قۇستىڭ ءوز مىنەزى بار. ونى ەگەسى بىلەدى. بالاپان كەزىنەن باستاپ باپتايمىز. بۇركىت ەلۋ- الپىس جىل جاسايدى. ەكى- ءۇش ساعات جاتتىقتىرامىز. قالاي ۇيرەتكەنىڭە بايلانىستى الادى. بابىندا تۇرسا ايتقانىڭدى ىستەيدى. ال بابىندا بولماسا باعىنباي كەتەدى.

- قۇستىڭ بابىن قالاي تابۋعا بولادى؟

- ءوزىنىڭ قالاعانىن جاسايمىز. جەم بەرەمىز، سۋ بەرەمىز، جۋىندىرامىز، كۇتىپ باپتايمىز. اۋىرىپ قالعان كەزدە جەمىنە قوسىپ، ءدارى بەرەمىز. دارۋمەندەرى بار.

  - اۋلاعان قۇسىن نە ىستەيسىڭدەر؟

 - وزىنە بەرىپ تويعىزىپ جەگىزىپ الامىز. ەگەر وزىنە بەرمەسەڭ ىزا بولادى دا كەلەسىدە قۇسقا تۇسپەي قويادى. ۇستاعان جەرىندە تويعىزىپ جەگىزۋ كەرەك.

  - ۇلتتىق سپورت ءتۇرىن دامىتىلىپ جاتىر. جارىستاردان بايگە الىپ جۇرسىڭدەر مە؟

 - بىلتىر جامبىل وبلىسى مەركە اۋدانىندا وتكەن جارىسقا قاتىستىق. اعام ەكەۋمىز بارعانبىز. اعام بۇركىتپەن 2- ورىن، مەن قارشىعامەن ءۇشىنشى ورىن الدىم.