دەنيس تەن كورەيادا وتەتىن وليمپياداعا قاتىسادى ما

الماتى. قازاقپارات - مانەرلەپ سىرعاناۋدان قازاقستان جۇلدىزى، وليمپيادانىڭ قولا جۇلدەگەرى دەنيس تەن جاس سپورتشىلاردى ۇيرەتۋ بارىسىندا ءوزىنىڭ فيزيكالىق دايىندىعى تۋرالى ايتىپ بەردى، دەپ حابارلايدى قازاقپارات ءتىلشىسى.

سپورتشى الدىڭعى جارىستا توبىعىن جاراقاتتاپ العان بولاتىن. قازىر ول كورەيا مەن قازاقستان دارىگەرلەرىنىڭ ەمىن قابىلداپ جاتىر. ازىرگە سپورتشى كەيبىر ەلەمەنتتەردى ورىنداۋ قيىن بولعاندىقتان قورعانىش پروتەكتورىمەن ءجۇر. فيگۋريست كورەيادا وتەتىن قىسقى وليمپياداعا قاتىسۋعا مۇددەلى. ءدۇبىرلى دوداعا قاتىسۋ ءۇشىن دەنيس ارنايى وتادان باس تارتقان. «مەن ەمدەلە وتىرىپ، جاتتىعۋدى جالعاستىرىپ جاتىرمىن. ءۇمىت بار. تەك قانا ءپوزيتيۆتى ويلاۋعا تىرىسىپ جاتىرمىن. وزىمە، ءوزىمنىڭ مۇمكىندىگىمە سەنىمدىمىن. كورەيا وليمپياداسىندا مەنىڭ ونەرىم كوپشىلىكتى تاڭ قالدىرادى دەپ ويلايمىن» ، - دەدى د. تەن.

سپورتشى جاراقاتىنان كەيىن مۇزعا قايتا ورالىپ فرانسيا مەن رەسەيدە ونەر كورسەتىپ ۇلگەردى. سوڭعى رەت دەنيس ديماش قۇدايبەرگەننىڭ S. O. S. d'un terrien en détress كومپوزيتسياسىنا سىرعانادى. سپورتشى ديماشپەن بولاشاقتا دا بىرگە جۇمىس جاساماق. وليمپيادالىق باعدارلامادا دا دەنيس ديماشتىڭ انىمەن ونەر كورسەتەدى. «بۇل كەرەمەت سايكەستىك بولدى. مەن ونىڭ ونەرىنە ءتانتىمىن. شەتەلدىك باسىلىمدارعا ديماش قۇدايبەرگەن قازاقستان عانا ەمەس ازيا جۇلدىزى ەكەنىن ايتىپ جۇرەمىن. ءبىر كۇنى ول الەم جۇلدىزى بولاتىن سات تۋادى. بىزدە سونداي تالانتتى ءانشى بار ەكەنى بارىمىزگە ماقتانىش. مەن ءۇشىن دە ساپالى مۋزىكاعا ونەر كورسەتۋ ابىروي. قولى تيمەسە دە مەن ءۇشىن ارنايى مۋزىكا جازىپ بەردى. بۇل وليمپيادانىڭ ارنايى باعدارلاماسىنا كىرەدى» ، - دەدى سپورتشى. ايتا كەتۋ كەرەك فيگۋريست وڭتۇستىك كورەيادا 10 تامىزدا وتكەن جارىستا جاراقات الىپ قالعان بولاتىن.

 

اۆتور: گۇلميرا ءعوسمانالي