قازاقستاننىڭ ەڭ قايىرىمدى جاندارى ماراپاتتالدى

الماتى. قازاقپارات - الماتىدا «التىن جۇرەك» رەسپۋبليكالىق سىيلىعىنىڭ جەڭىمپازدارى بەلگىلى بولدى، دەپ حابارلايدى قازاقپارات ءتىلشىسى. شارانى ۇيىمداستىرۋشىلاردىڭ سوزىنە قاراعاندا، ەلىمىزدە «التىن جۇرەكتى» ادامداردىڭ قاتارى جىل ساناپ ارتىپ كەلە جاتىر.

«التىن جۇرەكتىڭ» 11 جىلدىق تاريحىندا قايىرىمدىلىق جاساۋشىلار سانى 5 ەسەگە ءوستى. 2016-2017 -جىلداردىڭ ىشىندە تەك تۇسكەن وتىنىمدەرگە سايكەس 29,4 ميلليارد تەڭگەدەن اساتىن قايىرىمدىلىق شاراسىن جۇزەگە اسىرىلدى»، - دەدى «باۋىرجان» قورىنىڭ ۇيلەستىرۋشىسى گۋلزات ساحوۆا.

سالتاناتتى ماراپاتتاۋ شاراسىنا الماتى قالاسىنىڭ اكىمى باۋىرجان بايبەك قاتىستى. «التىن جۇرەك» سىيلىعى قايىرمدى ادامدارعا كورسەتىلگەن سىيلىق. قايىرىمدى ىستەردى ناسيحاتتاۋ اسا ماڭىزدى دەپ ويلايمىن»، - دەدى اتالعان سىيلىقتىڭ نەگىزىن قالاۋشى جۇلدىز وماربەكوۆا.

بيىلعى جىلى «التىن جۇرەك» سىيلىعىنا بارلىعى 150 ءوتىنىم بەرىلگەن. بۇل - رەكوردتىق كورسەتكىش. سولاردىڭ ىشىندە 80 ءوتىنىم جەكە تۇلعالاردان كەلىپ تۇسكەن. ساراپتامالىق كەڭەس وتىرىسىندا وتىنىمدەردىڭ ىشىنەن ازىرگە ءار اتالىمعا ءۇش ۇمىتكەردەن تاڭداپ الىندى. قوعامدىق كەڭەس مۇشەلەرى جاسىرىن داۋىس بەرۋ ارقىلى سولاردىڭ ىشىنەن جەڭىمپازداردى انىقتايدى.

 قوعامدىق كەڭەستىڭ قۇرامىنا قوعام جانە مادەنيەت قايراتكەرلەرى، اقىن- جازۋشىلار، كينەماتوگرافيستەر، ب ا ق وكىلدەرى ەنگەن. ولاردىڭ ىشىندە تانىمال جازۋشى- دراماتۋرگ احمەتجان ءاشىروۆ، لاست ينتەرنەت- جۋرنالىنىڭ باس رەداكتورى ۆياچەسلاۆ ابراموۆ، كينورەجيسسەر سەرگەي ازيموۆ، تەلەجۇرگىزۋشى قىمبات حانگەلدينا بار.

«التىن جۇرەك» سىيلىعىنا قازىلىق ەتۋ وتە قيىن. ۇسىنىلعان تۇلعالاردىڭ بارلىعى دا قۇرمەتكە لايىق، جۇرەگى التىن ادامدار عوي. بارلىعىن دا ماراپاتتاعىڭ كەلەدى. ءبىراق، وكىنىشكە قاراي، ءاربىر اتالىمدا ءبىر عانا جەڭىمپاز بولۋى شارت. مەن ءوز باسىم قايىرىمدىلىقپەن اينالىساتىن ادامداردىڭ الدىندا باسىمدى يەمىن. ولار قوعام تاراپىنان ۇلكەن قۇرمەتكە لايىق ازاماتتار. وسى سىيلىقتى ۇيىمداستىرۋشىلار تاراپىنان قىرۋار جۇمىستار اتقارىلىپ جاتىر. سوندىقتان، قوعام تاراپىنان بۇل شاراعا ۇلكەن قولداۋ قاجەت»، - دەدى قىمبات حانگەلدينا.

«التىن جۇرەك» بويىنشا 11 اتالىم بەلگىلەنگەن. سونىمەن «التىن جۇرەكتىڭ» بيىلعى جەڭىمپازدارى مىنالار بولدى:

 1. «جەتىم بالالارعا كورسەتكەن قامقورلىعى ءۇشىن» - ەكاتەرينا ياتسەنكو (پاۆلودار وبلىسى)؛

 2. «ءبىلىمدى دامىتۋعا قوسقان ۇلەسى ءۇشىن» - مۇرات ءادىلحانوۆ (الماتى)؛

 3. «مۇگەدەك جاندارعا كورسەتكەن قامقورلىعى ءۇشىن» - ءبىرجان قۇجاقوۆ (ب ق و، ورال)؛

4. «سپورتتى دامىتىپ، ونى قولداعانى ءۇشىن» - «الماتى مارافونى» سپورتتىق قايىرىمدىلىق شاراسى (الماتى)؛

 5. «ارداگەرلەرگە كورسەتكەن قۇرمەتى ءۇشىن» - راسيما تەمەربايەۆا (الماتى)؛

 6. «جىل مەسەناتى» - سەرگەي سپيتسىن (الماتى)؛

 7. «اقپاراتتىق قولداۋشى» - مايرا ابدراحمانوۆا (الماتى)؛

 8. «جىلدىڭ قايىرىمدى ادامى» - تەمىرلان شاينۋسيپوۆ (الماتى وبلىسى، اق تەرەك اۋلى)؛

 9. «دەنساۋلىق ساقتاۋ سالاسىنا قولداۋ كورسەتكەنى ءۇشىن» - «28 پەتەل» كلۋبى (استانا)؛

 10. «قازاقستاننىڭ وركەندەۋىنە قوسقان ۇلەسى ءۇشىن» - ۆيكتوريا شاربونۋ جانە ەليزابەت تۋرنوك (ا ق ش).

اۆتور: گۇلميرا عوسمانالي