قازاق كۇرەسىنەن الەم چەمپيوناتىنداعى ەڭ اۋىر سالماقتاعى بالۋاندار كىم

استانا. قازاقپارات - استانادا قازاق كۇرەسىنەن ءوتىپ جاتقان بالۋانداردىڭ ىشىندە ەڭ جەڭىل جانە ەڭ اۋىر سالماقتاعى بالۋانداردىڭ ەسىمدەرى بەلگىلى بولدى، دەپ حابارلايدى قازاقپارات ءتىلشىسى.

 ەڭ جەڭىل سالماقتاعى بالۋان قازاقستاندىق مارات نىعماتۋللايەۆ بولسا، ەڭ اۋىر سالماقتاعى بالۋان جاڭازەلەنديادان كەلگەن پەمبەرتون چيكو اتاندى. وتانداسىمىزدىڭ سالماعى 54 كەلى 800 گرام بولسا، چيكونىڭ تازا سالماعى 178 كەلى 600 گرام. وسى الىپ سالماقتاعى بالۋانمەن بوز كىلەمدە وتانداسىمىز رۋسلان ءابدىرازاقوۆتىڭ جولى ءتۇيىسۋى مۇمكىن.

 ايتا كەتەيىك، الەم بىرىنشىلىگىنە 40 مەملەكەتتەن كەلگەن 166 سپورتشى باق سىناپ جاتىر. ولار 9 سالماق دارەجەسىندە 40 مەدال مەن 40 مىڭ ا ق ش دوللارىن قۇرايتىن جۇلدە قورىن ساراپقا سالادى. ءار سالماق دارەجەسىنىڭ جەڭىمپازدارى 2000 ا ق ش دوللارىنا يە بولسا، ەكىنشى ورىنعا - 1000 ا ق ش دوللارى، ءۇشىنشى ورىنعا - 500 ا ق ش دوللارى بەرىلەدى. ال ءابسوليۋتتى سالماق جەڭىمپازى - 5000، ەكىنشى ورىن - 2000، ءۇشىنشى ورىن - 1000 ا ق ش دوللارىنا يە بولادى. قازاقستان قۇراماسىنان توعىز سپورتشى قاتىسادى. ولار: مارات نىعماتۋللايەۆ 55 كەلى، قۋانىش ىسقاقوۆ 60 كەلى، قاسىمحان تولەنباي 66 كەلى، عالىمجان ءابدىراحمانوۆ 74 كەلى، ەرسۇلتان مۇزافاروۆ 82 كەلى، ءادىلجان ىستىبايەۆ 90 كەلى، الەكساندر كاساچيەۆ 100 كەلى، رۋسلان ءابدىرازاقوۆ 100+ كەلى، ايبات سەيتەن (تۇيە بالۋان).

 اۆتور: كۇنسۇلتان وتارباي