ەلوردادا جاس اقىندار ءمۇشايراسىنىڭ جەڭىمپازدارى بەلگىلى بولدى
مەديا ورتالىقتىڭ حابارلاۋىنشا، ەلوردادا قالالىق جاستار ساياساتى ماسەلەلەرى باسقارماسىنىڭ ۇيىمداستىرۋىمەن 16-29 جاس ارالىعىنداعى اقىندار اراسىندا ءمۇشايرا جەڭىمپازدارىن ماراپتتاۋ ءراسىمى ءوتتى. جاس اقىندار «مەملەكەتتىك رامىزدەر - ماقتاناشىم» جانە «ماڭگىلىك ەل - مۇراتىم» تاقىرىبىندا جىر جازعان.
وسىلايشا قازىلار القاسىنىڭ شەشىمىمەن، جۇلدەلى Ⅲ ورىندى ءابىل ميراس (استانا قالاسى)، ديدار (اتىراۋ وبلىسى)، شەرحان تالاپ (باتىس قازاقستان وبلىسى) ءوزارا ءبولىسىپ، 100 مىڭ تەڭگەلىك سىياقىعا يە بولدى. 200 مىڭ تەڭگەلىك Ⅱجۇلدەنى قاراعاندىلىق اقجىگىت امانكەلدى قانجىعىسىنا بايلاسا، 1 - ورىنعا يە بولعان راۋان قابيدولدين (شىعىس قازاقستان) 300 مىڭ تەڭگەنى ەنشىلەدى.
ال «ۇزدىك اقىن» اتالىمىنا الىبەك اماندىقوۆ (اتىراۋ وبلىسى)، ءجاميليا باحتيار قىزى (الماتى وبلىسى)، اينۇر پولاتوۆا (اقتوبە وبلىسى)، ۇلجالعاس مامادياروۆا (وڭتۇستىك قازاقستان وبلىسى) لايىقتى دەپ تانىلدى. ولارعا 50 مىڭ تەڭگە كولەمىندە ىنتالاندىرۋ سىيلىعى تابىستالدى.
ءمۇشايرانىڭ نەگىزگى ءبولىمى قازاقستان ەستراداسى جۇلدىزدارىنىڭ قاتىسۋىمەن وتكەن كونسەرتتىك باعدارلاماعا ۇلاستى.
قالا دەڭگەيىندە مۇنداي شارانى وتكىزۋدىڭ ماقساتى - ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ شەڭبەرىندە جاستار اراسىندا ۇلتتىق بىرەگەيلىك پەن ۇلتتىق قۇندىلىقتارىمىزدى ناسيحاتتاۋ، جاس اقىنداردىڭ شىعارماشىلىعىن دامىتۋعا جاعداي جاساۋ، مەملەكەتتىك رامىزدەردى ناسيحاتتاي وتىرىپ، جاستاردى وتانسۇيگىشتىككە تاربيەلەۋ. ماراپاتتاۋ راسىمىنە ق ر ءماجىلىسىنىڭ دەپۋتاتى باقىتبەك سماعۇل مەن استانا قالاسىنىڭ زيالى قاۋىم وكىلدەرى قاتىستى.
ايتا كەتەيىك، قالالىق ءمۇشايرا ەلوردا اكىمدىگىنىڭ جاستار ساياساتى ماسەلەلەرى باسقارماسىنىڭ الەۋمەتتىك تاپسىرىسىن ورىنداۋ اياسىندا وتكەن بولاتىن.
