قازاقستاندا مال جايىلىمى جەتىسپەيدى - عالىمدار

استانا. قازاقپارات - قازاقستاندىق عالىمدار ەلدەگى مال جايىلىمىنىڭ جاي- كۇيىنە الاڭداۋلى، دەپ حابارلايدى قازاقپارات ءتىلشىسى.

 «وكىنىشكە وراي، شارۋا ءوز مالىن الىسقا شىعارا المايدى، ءوز تۇرعىلىقتى جەرىنەن ءارى كەتسە 50 شاقىرىم راديۋستا جايىپ جۇرەدى. سالدارىنان ەلدىمەكەندەر ماڭىنداعى ورىستىك جەرلەرگە ۇلكەن زاقىم كەلۋدە»، - دەدى «ا. ي. بارايەۆ اتىنداعى ا ش ع ءو و» ج ش س ەگىستىك زەرتحاناسىنىڭ جەتەكشى عىلىمي قىزمەتكەرى ۆيكتور يۋرچەنكو ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

«ا. ي. بارايەۆ اتىنداعى ا ش ع ءو و» ج ش س ەگىستىك زەرتحاناسىنىڭ جەتەكشى عىلىمي قىزمەتكەرى ۆيكتور يۋرچەنكو جايىلىمدىق جەرلەردىڭ ءتيىمدى قولدانىلمايتىنىن، وعان كوپتەگەن مال باسىنىڭ جەكە قولدا بولۋى سەبەپ ەكەنىن باسا ايتتى.

«جەكە شارۋاشىلىقتاعى مالعا اۋىل ماڭىنان جايىلىم جەتىسپەي جاتىر. وندا مالدىڭ ءاربىر باسىنا 2,5 گەكتاردان كەلەدى، ال نورما بويىنشا ءارقايسىسىنا 8-10 گەكتار جەر كەرەك. دەمەك، مال جايىلىمدارىنا نورمادان 2-3 ەسە ارتىق سالماق تۇسۋدە. بۇل ماسەلەنى رەتتەۋ كەرەك»، - دەپ اتاپ ءوتتى ۆ. يۋرچەنكو.

 عالىمنىڭ پىكىرىنشە، قازاقستاندا شامامەن 182 ميلليون گەكتارعا جۋىق ۇلكەن جايىلىم القابى بار، 5 ميلليون گەكتار شابىندىق جانە 2,5 ميلليون گەكتار جەر مال ازىعى داقىلدارى ءۇشىن قولدانىلادى. ايتسە دە، ەلدىمەكەندەر ماڭىنداعى جايىلىمدىق جەرلەرگە ەكى- ءۇش ەسە ارتىق سالماق ءتۇسىپ وتىر.

اۆتور: ايجان سەرىكجان قىزى