اۋەدە رەسەي ۇشاعىنىڭ جانارمايى تاۋسىلىپ قالعان

 استانا. قازاقپارات - كەشە، 26 - قازان كۇنى رف نيجنەكامسكىدەن ماسكەۋگە ۇشىپ كەلە جاتقان رەسەيلىك اۋە كومپانياسىنا تيەسىلى ۇشاقتىڭ جانارمايى ءبىتىپ قالعان.

لاينەردىڭ جانارمايى ماسكەۋگە جاقىنداپ قالعان كەزدە تاۋسىلا باستاعان، ءبىراق قونۋى ءتيىس بولعان شەرەمەتيەۆو اۋەجايىنا دەيىن ايتارلىقتاي قاشىقتىق بار ەدى. سول ساتتە ۇشاق ماسكەۋدىڭ باسقا اۋدانىنداعى اۋە ايلاعىنىڭ - دومودەدوۆو اۋەجايىنىڭ اۋماعىندا ۇشىپ كەلە جاتقان. ديسپەتچەرلەر اۋە كەمەسى ءۇشىن ارنايى جولاقتى بوساتىپ، ونىڭ ءساتتى قونۋى ءۇشىن جاعداي جاساۋعا ءماجبۇر بولدى. «اەروفلوتتىڭ» سايتىنداعى دەرەكتەرگە سايكەس، وقيعا SU 1253 رەيسىندە ورىن العان. ۇشاق جولعا 1 ساعات 45 مينۋت ەمەس، ءتورت ساعات ۋاقىت جۇمسادى، دەپ حابارلايدى Mash Telegram ارناسى.

 

اۆتور: اقبوپە ءابدراسۋل