ماريا جاگور قىزىنىڭ بەيىتى «قاسيەتتى جەرلەر» كارتاسىنا ەندى

كوكشەتاۋ. قازاقپارات - ماريا رەكينا بەيىتى اقمولا وبلىسىنىڭ «قاسيەتتى جەرلەر» كارتاسىنا ەندى، دەپ حابارلايدى قازاقپارات ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.

  ماريا رەكينانىڭ بەيىتى قورعالجىن اۋدانىنداعى سابىندى اۋىلىنا 9 شاقىرىم قاشىقتىقتا ورنالاسقان. قازاقتىڭ دۇيسەن ەسىمدى جىگىتىنە عاشىق بولعان ورىس قىزىنىڭ تاريحى ساقتالىپ قالعان. ءبىراق جاستاردىڭ باقىتىنا ادەت- عۇرىپتار كەدەرگى بولادى. بىردە ماريانى كورشى اۋىلدان كەلگەن قۇدالار كۇتىپ وتىرادى. بۇل شەشىمدى قابىلداۋعا شاماسى بولماعان قىز دالاعا قاشىپ كەتەدى.

 اڭىزعا سۇيەنسەك، وسى ۋاقىتتا عاشىعىنا ارناعان «دۋدار- اي» ءانى دۇنيەگە كەلگەن. كوپ كەشىكپەي دۋدار ونىڭ سوڭىنان بارادى. ولار كوپ قيىنشىلىق كورەدى، وزەننىڭ جاعاسىندا تۇرادى، جاعالاۋداعى قامىستاردى باسپانا ەتەدى. بۇعان دۇيسەننىڭ اتا- اناسى توزبەي، جاستاردى ۇيگە قايتارىپ، تويلارىن جاسايدى. دەگەنمەن بۇل باقىتتارى دا ۇزاققا بارماعان. ۇيلەنۋ تويىنان كەيىن دۇيسەن پاتشا اسكەرى قاتارىنا شاقىرىلادى. سول جاقتا وكپە اۋرۋىنا شالدىعىپ، قايتىس بولادى. ال ونىڭ جەسىرى، نەبارى، 18 جاستا عانا ەدى.

كەيىن ماريا تۇرمىسقا شىعىپ، دۇنيەگە ءتورت بالا اكەلەدى. كۇيەۋى جاقسى كىسى بولادى. ماريام جۇرەگىنىڭ تۇكپىرىندە دۇيسەن جايلى ەستەلىكتەرىن ساقتاپ، كۇيەۋىنە سىيلاستىق كورسەتكەن. ماريا ەگوروۆنا رەكينا 1899 -جىلى دۇنيەگە كەلگەن. ءومىرىنىڭ باسىم بولىگىن قورعالجىن اۋدانىنىڭ كەڭبيدايىق اۋىلىندا وتكىزگەن. ۇلى وتان سوعىسى جىلدارىندا م. رەكينا ءوز ولەڭدەرىن مايدانعا اتتانىپ جاتقان جەرلەستەرىنە ارناعان. وعان «قازاق س س ر ەڭبەك سىڭىرگەن مادەنيەت قايراتكەرى» اتاعى بەرىلدى. «دۋدار- اي» ولەڭى ءارتۇرلى ۇلتتاردىڭ ماحابباتىنا، جىلىلىعىنا جانە دوستىق رۋحىنا تولى.