قىتاي بەنزينمەن جۇرەتىن كولىكتەن باس تارتادى

  بۇل جونىندە قىتايدىڭ ونەركاسىپ جونىندەگى ءمينيسترىنىڭ ورىنباسارى سين گۋوبين مالىمدەدى. ەندى شىعىستاعى كورشىمىز 2025 -جىلى 7 ميلليون ەلەكتروموبيل شىعارۋدى دىتتەپ وتىر. توقپەن قوزعالاتىن كولىكتەردى جالپىلاستىرۋعا قىتاي وسى باستان كىرىسىپ كەتتى. جانارمايسىز جۇرەتىن كولىك ءوندىرىسى «Made in China 2025» باعدارلاماسىنا كىرەدى. وسىلايشا كورشىمىز قورشاعان ورتانى لاستامايتىن كولىك شىعارۋ بويىنشا الەمدە كوش باستاپ وتىر.

قازىر بەيجىڭ كوشەلەرىندە ەلەكتروموبيلدەردى جالعا الۋعا بولادى. قىتاي جولاۋشىلار كولىگى قاۋىمداستىعىنىڭ مالىمەتىنشە، بيىل 7 ايدا ءبىر عانا BYD كومپانياسى جەرگىلىكتى نارىققا 50 مىڭعا جۋىق ەلەكترلى جانە گيبريدتى كولىك شىعاردى. بۇل سالانى مەملەكەت قولداپ، ۇنەمى قوماقتى سۋبسيديا ءبولىپ وتىرادى. سونىمەن قاتار ەلدى جاپپاي ەلەكتروموبيلگە كوشىرۋ ءۇشىن كولىك شىعاراتىن كاسىپورىندارعا دا قاتاڭ تالاپتار قويدى.

 مەن فاني، ەلەكتروموبيل شىعاراتىن كومپانيا وكىلى:

 - قىتايدىڭ الداعى 20 جىلدا تولىقتاي جانارمايمەن جۇرەتىن كولىك ءوندىرىسىن توقتاتۋى قورشاعان ورتاعا دەگەن جاۋاپكەرشىلىكتى سەزىنۋ دەر ەدىم. ءبىز وسى سالانى دامىتىپ، الەمدە بىرەگەي وندىرىستىك ورتانى قۇرۋ ءۇشىن 3,5 ميلليارد دوللار اقشا ءبولىپ وتىرمىز. سوندىقتان كومپانيامىزدىڭ تەحنيكالىق مۇمكىندىكتەرى جاسىل ەنەرگيامەن قوزعالاتىن كولىك وندىرىسىنە ابدەن جەتەدى.

 قىتاي بيلىگى قازىردىڭ وزىندە ءىرى قالالارداعى قورشاعان ورتانىڭ لاستانۋىنا، كليماتتىڭ وزگەرۋىنە جانە ەلدىڭ مۇناي يمپورتىنا تاۋەلدىلىگىنە الاڭداپ وتىر. سوندىقتان ۇكىمەت بالامالى ەنەرگيا كوزدەرىمەن قوزعالاتىن كولىك ءوندىرىسىن جان- جاقتى قولدايدى. تىپتەن مۇنداي كولىكتى ساتىپ الۋشىلارعا ءبىرقاتار جەڭىلدىكتەر قاراستىرىلعان.

جان تياني، بەيجىڭ تۇرعىنى:

 - بولاشاقتا جانارمايمەن جۇرەتىن كولىكتەرگە تىيىم سالۋدى دۇرىس دەپ سانايمىن. ەگەر بولاشاقتا ەلەكتروموبيل ارزان بولسا، ونى نەگە پايدالانباسقا. قازىردىڭ وزىندە قالانىڭ ىشىنە ابدەن جاراپ تۇر.

قازىر ەلەكتروموبيل شىعارۋعا قىتايلىق 200 كومپانيا نيەت بىلدىرگەن. قىتاي بۇل ستراتەگيانى جۇزەگە اسىرۋ ارقىلى بولاشاقتا الەمدىك نارىقتاعى وسى سالانى يەلەنىپ الماق. الداعى ۋاقىتتا جانارمايمەن جۇرەتىن كولىكتەردىڭ ءوندىرىسى مەن ساۋداسىنا تىيىم سالۋدىڭ ناقتى كۇنتىزبەسىن جاريالاۋدى جوسپارلاپ وتىر.

 جاو شيننان، بەيجىڭ تۇرعىنى:

 - بەنزيندى كولىكتەرگە تىيىم سالۋدى 2040 -جىلدان ەرتەرەك باستاۋ كەرەك. ويتكەنى ءبىزدىڭ قالالارداعى ەكولوگيالىق احۋال ناشار. جانارمايمەن جۇرەتىن كولىكتەن شىعاتىن ءتۇتىننىڭ سالدارىنان بەيجىڭدە اۋا لاس.

ەستەرىڭىزگە سالايىق، الەمدە اۆتوكولىك وندىرىسىندە قىتاي ەشقاشان كوش باستاپ كورگەن ەمەس. ال ەلەكتروموبيل شىعارۋ بويىنشا بىردەن العا سۋىرىلىپ شىقتى. بىلتىر بۇل ەلدە وسىنداي جارتى ميلليون كولىك ساتىلعان.

www.24.kz