وزبەكستاننىڭ بۇرىنعى پرەزيدەنتىنىڭ قىزى گۇلناردىڭ شۆەيتسارياداعى بايلىعىنا بىرنەشە ەل تالاسىپ جاتىر

ماسەلە 800 ميلليون ا ق ش دوللارىنا قاتىستى. ءىس ءالى سوتقا بەرىلمەدى. ءبىراق بۇل اقشاعا تالاس باستالىپ كەتكەن دەپ حابارلايدى ورتالىق ازيانىڭ جاڭالىقتار قىزمەتى.

«2012-جىلدىڭ شىلدە ايىندا التى ادامعا، ونىڭ ءبىرى گۇلنار كاريموۆاعا قاتىستى قىلمىستىق ءىس قوزعالدى. ولار كولەڭكەلى اقشانىڭ ءىزىن جاسىرماق بولدى دەپ ايىپتالادى. شۆەيتساريا پروكۋراتۋراسى ازىرگە 800 ميلليون فرانكتى (شامامەن 784 ميلليون ا ق ش دوللارى) بۇعاتتاپ وتىر. بۇل ءىس 19 ەلدىڭ قۇقىقتىق كومەگىمەن جۇزەگە اسىرىلدى»، - دەلىنگەن شۆەيتساريانىڭ فەدەرالدى پروكۋراتۋراسى تاراتقان مالىمدەمەدە.

«بەرن دەكلاراتسياسى» تاۋەلسىز ۇيىمىنىڭ ساراپشىسى وليۆە لونگشان گۇلنار كاريموۆانىڭ ءىسى حالىقارالىق قۇقىقتانۋدا ەڭ بىلىققا باتقان ءىس ەكەنىن ايتادى.

«نەگىزىندە بۇعاتتالعان اقشا مەن بايلىقتىڭ جالپى سوماسى ءبىر ميلليارد دوللار. ەكىنشىدەن، بۇل ءىستى 19 ەلدىڭ زاڭگەرلەرى قاراپ جاتىر. بۇل ماسەلەدە اتالعان ەلدەردىڭ زاڭ وكىلدەرى اراسىندا كيكىلجىڭنىڭ تۋىنداۋى زاڭدى» ، - دەيدى وليۆە لونگشان.

سول سەبەپتەن شۆەيتساريا پروكۋراتۋراسى تەزىرەك ءىستى سوتقا بەرۋگە مۇددەلى دەيدى ساراپشى لونگشان.

Le Temps گازەتىنىڭ 19- قازانىندا جارىق كورگەن ماقالاسىندا بۇعاتتالعان اقشاعا نەگىزىنەن وزبەكستان، ا ق ش جانە گوللانديا تالاسىپ وتىرعانى ايتىلعان. رەسمي تاشكەنت وزبەك اقشاسىن ەلگە قايتارۋدى تالاپ ەتەدى.

ا ق ش بولسا، قارجى جىمقىرۋ امەريكا بانكتەرى ارقىلى جۇزەگە اسقان دەيدى. ال گوللانديا بولسا، پارا بەرگەن ءوز ەلىنىڭ كومپانياسى، بۇل گوللاندىقتاردىڭ اقشاسى دەپ ەسەپتەيدى.