ۇكىمەت باسشىسى باقىتجان ساعىنتايەۆ ماڭعىستاۋ جۇرتشىلىعىمەن ءوڭىردىڭ وزەكتى ماسەلەلەرىن تالقىلادى
ماقسات - «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن «بولاشاققا باعدار: رۋحاني جاڭعىرۋ» باعدارلاماسىندا ەلباسى جۇكتەگەن مىندەتتەردىڭ ورىندالۋ بارىسىمەن تانىسۋ.
«اتامەكەن» ۇلتتىق پالاتاسى وڭىرلىك كەڭەسىنىڭ كاسىپكەرلەرىمەن وتكەن كەزدەسۋدە وبلىستاعى شاعىن جانە ورتا بيزنەستى قولداۋعا باعىتتالعان شارالار قارالدى. سونداي- اق باقىتجان ساعىنتايەۆ ەل ەكونوميكاسىن دامىتۋداعى ستراتەگيالىق ماڭىزعا يە ءبىرقاتار ينفراقۇرىلىمدىق نىساندى ارالادى.
«قازاق قۇبىرجوندەۋ» زاۋىتى مەن قۇرىق پورتىنىڭ قۇرىلىسىن قاراپ شىقتى. ايلاقتا ۇكىمەت باسشىسىنا پورتتىڭ 2030 -جىلعا دەيىنگى دامۋ جوسپارى تانىستىرىلدى. ساپار اياسىندا ۇكىمەت باسشىسى ءوڭىر جۇرتشىلىعىمەن جۇزدەستى. كەزدەسۋدە ەلباسى جولداۋى، «نۇرلى جول» جانە «نۇرلى جەر» مەملەكەتتىك باعدارلامالارىنىڭ ىسكە اسىرىلۋ جايى مەن ءوڭىر ءۇشىن وزەكتى سانالاتىن حالىقتى اۋىزسۋمەن قامتۋ، ەكولوگيا، تۋريزم، دەنساۋلىق ساقتاۋ جانە ءبىلىم سالاسىن دامىتۋ ماسەلەسى تالقىلاندى. جيىنعا ارداگەرلەر، دەپۋتاتتار، ۇكىمەتتىك ەمەس ۇيىم مەن ءبىرقاتار مينيسترلىك پەن ۆەدومستۆو وكىلدەرى قاتىستى. قايتا وقىتۋ مەن جاڭا جۇمىس ورىندارىن اشۋ جايىنا باسا نازار اۋدارىلدى.
www.24.kz
