ەلوردادا بيلەر مەكتەبىن اشۋ ۇسىنىلدى
قاراعاندى وبلىسى اكىمىنىڭ باسپا ءسوز قىزمەتى حابارلاعانداي، بيلەر مەكتەبىن اشۋ يدەياسى قاراعاندىداعى «قازىبەك ءبيدىڭ قىزمەتى مەن شىعارماشىلىعى قوعامدىق سانانى جاڭعىرتۋدىڭ ماڭىزدى فاكتورى رەتىندە» عىلىمي- تاجىريبەلىك كونفەرەنسيادا ايتىلعان.
گۋميليەۆ اتىنداعى ەۋرازيا ۇلتتىق ۋنيۆەرسيتەتى تۇركىتانۋ كافەدراسىنىڭ مەڭگەرۋشىسى، پروفەسسور مىرزاتاي جولداسبەكوۆ كوپتەن بەرى بيلەر مەكتەبىن اشۋ تۋرالى يدەيانى ۇسىنباقشى بولعانىن جاسىرمادى.
«قازىر جاستاردىڭ كوبىسى گادجەتتەرگە ءۇڭىلىپ، قارىم- قاتىناس جاساۋ قابىلەتىن جوعالتۋدا، - دەدى مىرزاتاي جولداسبەكوۆ. - مەن كوپتەن بەرى استاندا ءۇش بيگە - تولە، قازىبەك جانە ايتەكە بيگە ارنالعان بيلەر مەكتەبىن اشۋدى ۇسىنعىم كەلگەن. بۇل مەكتەپتەردە ءبىز بالالارعا تاريحتى، شەشەندىك ونەردى، ديپلوماتيانى ۇيرەتە وتىرىپ، ءداستۇرلى قۇندىلىقتارمەن سۋسىنداتار ەدىك». پروفەسسور، سونداي- اق، اباي قۇنانبايەۆقا ارنالعان وسىنداي مەكتەپتى اشۋ قاجەتتىگىن اتاپ ءوتتى.
جازۋشى جانە پۋبليتسيست الدان سمايىل دا شەشەندىك ونەر كۋرستارىن اشۋدى ۇسىندى.
«وسكەلەڭ ۇرپاقتى ادەمى سويلەپ، ءوز ويىن ەركىن جەتكىزۋگە ۇيرەتۋ قاجەت. مەن قازىبەك ءبيدىڭ شەشەندىك ونەرىن تاقىرىپ بويىنشا بولىمدەرگە جانە كەزەڭدەرگە ءبولىپ، جاستارعا ۇيرەتۋدى ۇسىنامىن»، - دەدى جازۋشى.
ايتا كەتەيىك، «رۋحاني جاڭعىرۋ» باعدارلاماسى اياسىندا ۇيىمداستىرىلعان عىلىمي- تاجىريبەلىك كونفەرەنسيا قازىبەك ءبيدىڭ 350 جىلدىعىنا ارنالعان.
اۆتور: اقبوپە ءابدراسۋل
