كاسپي تەڭىزىندە قايراڭداپ قالعان رەسەي كەمەسىنىڭ يەلەرى ىزدەستىرىلىپ جاتىر

 استانا. قازاقپارات - بىلتىر كورشى رەسەي ەلىنىڭ مۇناي تاسيتىن تانكەرى ماڭعىستاۋ وبلىسىنداعى جاعالاۋعا كەلىپ، قاڭتارىلىپ قالعان ەدى.  سودان بەرى ۋلى زاتقا تولى الىپ كەمەنىڭ يەلەرى سۋ كولىگىن قۇتقارۋعا قۇلىق تانىتپاعان.

 سوندىقتان دا تەڭىز بەن ەكولوگياعا تونگەن قاۋىپتىڭ الدىن الۋعا امالسىزدان ماڭعىستاۋ بيلىگى كىرىستى. كەمەگە جاۋاپتى كومپانيا باسشىلارىن قازاقستانمەن قاتار رەسەيدىڭ قۇزىرلى ورگاندارى دا سوتقا بەردى. ولاردىڭ جاۋاپسىزدىعىنان ءبىر جارىم اي سۋ كولىگىندە جالعىز قالعان مەحانيك وزىنە قول جۇمساعان.

«اراكس» اتتى رەسەيدىڭ الىپ كەمەسى وتكەن جىلدىڭ 15 - قاراشاسىنان بەرى جاعالاۋدان 100 مەتر جەردە قاڭتارىلىپ تۇر. كورشى ەلدىڭ تانكەرىن كاسپيدە سوققان قاتتى داۋىل قازاقستان اۋماعىنا ايداپ اكەتكەن. زاكىرى سىنعان سۋ كولىگى قۇرىق پورتى ماڭىنا بارىپ قايراڭداپ قالادى. كەمەدە ءۇش ادام بولعان. ءبىر اپتا وتكەن سوڭ ونىڭ ەكەۋى كەمەنى تاستاپ قاشپاق بولادى.

الىبەك قايىپوۆ، ق ر شەكارا قىزمەتى «جاعالاۋ كۇزەتى» وڭىرلىك باسقارماسىنىڭ باسشىسى:

- ءبىز كەمە كومانديرى مەن ونىڭ كومەكشىسىن اتىراۋ وبلىسىندا ۇستادىق. ولار شەكارا اسىپ، ەلىنە قاشپاق بولعان. رەسەي تەڭىزشىلەرى، قازاقستان زاڭىنا سايكەس، كەمەدەن شىقپاۋى ءتيىس ەدى. ولار قازاقستان اۋماعىندا ءجۇرۋ زاڭىمەن قاتار تەڭىزدە ءجۇرۋ ءتارتىبىن دە بۇزعان. اپاتقا تاپ بولىپ، ءبىزدىڭ اۋماققا وتەتىنى تۋرالى الدىن الا ەسكەرتپەگەن.

ال كەمەدە 40 كۇن بويى جالعىز وتىرعان مەحانيك بۇعان توزە الماي، وزىنە قول جۇمساپتى. ول ءومىرىنىڭ سوڭعى ساتىنە دەيىن كەمە يەلەرىنە حابارلاسىپ، تەزىرەك الىپ كەتۋىن سۇراعان. باستاپقىدا ۋادە بەرۋمەن كەلگەن قوجايىندار سوڭعى كۇندەرى بايلانىستى مۇلدە ۇزگەن. جاقسىلىقتان كۇدەر ۇزگەن تەڭىزشى قىستىڭ ىزعارلى كۇنى سۋعا سەكىرىپ كەتەدى. ونىڭ دەنەسى بىرنەشە كۇننەن كەيىن تابىلدى. رەسەيدىڭ قۇزىرلى ورگاندارى كەمە يەلەرىنە قاتىستى قىلمىستىق ءىس قوزعادى. الايدا كەمەگە جاۋاپتى كومپانيا باسشىلارى ۇشتى- كۇيلى جوق، قاشىپ ءجۇر.

 نۇربول ەرمانوۆ، اقتاۋ جانە باۋتينو پورتتارىنىڭ تەڭىز اكىمشىلىگى باسشىسى:

 - ەندى ءبىزدىڭ تاراپىمىزدان ايىپپۇل سالۋ ءۇشىن كەمە يەسى كەرەك. كەمە يەسى بىزگە كەلگەن جوق. ءبىزدىڭ حاتتارىمىزعا جاۋاپ بەرگەن جوق. وسى سوڭعى تەرگەۋ امالدارى جۇرگىزىلدى. ءبىزدىڭ تەرگەۋ دەپارتامەنتىمەن بىرلەسىپ رەسەي فەدەراتسياسىنىڭ ورگاندارىمەن تەكسەرىس جۇرگىزىلدى. قورىتىندىسىمەن كەمە يەسىن كىنالى دەپ تاپتى. ءبىراق بىزدەگى اقپاراتتار بويىنشا، كەمە يەسى وسى قازىرگى كۇندە زاڭدى تۇلعا رەتىندە ءوزىنىڭ قىزمەتىن توقتاتقان. زاڭدى تۇلعا رەتىندە. «ترانس كاسپي» مەكەمەسى قازىر زاڭدى تۇلعا رەتىندە ەش جەردە كورسەتىلمەيدى.

ءبىر جىلدان بەرى كەمە يەلەرى تابىلماعاندىقتان، 900 تونناداي ۋلى زاتتى ارقالاعان «اراكستى» زالالسىزداندىرۋ ىسىنە ماڭعىستاۋ وبلىسىنىڭ اكىمدىگى كىرىستى. سەبەبى كەمە قۇلاپ نە تەسىلگەن جاعدايدا قورشاعان ورتاعا زور قاۋىپ ءتونۋى مۇمكىن. تەڭىز لاستانىپ، اۋاعا ۋلى زاتتار تاراپ كەتەدى. سوندىقتان دا رەزەرۆتىك قوردان 40 ميلليون تەڭگە ءبولىنىپ، كەمەنى مۇناي قالدىعىنان تازالاۋ جۇمىستارى باستالدى.

 ايبولات اسانعاليەۆ، «باتىس مۇناي ترانس» ج ش س ديرەكتورى:

 - ەكى اپتادا ءبىتىرىپ بەرەمىز دەپ تۇرمىز، اۋا رايى جاقسى بولسا. تازالايمىز. تەڭىزدى بۇلدىرەتىن زاتتار تەڭىزگە تۇسپەيدى. سولاي كەلىسىم جاسادىق. قولىمىزدان كەلگەنشە ءبارىن ىستەيمىز.

قازىر قازاقستاننىڭ پورتتارى اكىمشىلىگى تانكەردى يەسىز دەپ تانۋ جونىندە سوتقا ارىز دايىنداۋدا. ماڭعىستاۋ وبلىسىنىڭ سوتى ارىزدى قاناعاتتاندىرسا، رەسەي كەمەسى قازاقستان مەنشىگىنە وتەدى.

www.24.kz