قىتاي قاعاز اقشادان باس تارتقان ءبىرىنشى ەل اتانۋى مۇمكىن

 وسىلايشا قولما- قول اقشاسىز ەسەپ ايىرىسۋعا كوشكەن تۇتىنۋشىلار سانى 500 ميلليونعا جەتكەن. قازىر كورشى ەلدەگى ءىرى قالالاردىڭ كەز كەلگەن تۇرعىنى تولەمدى ءوز سمارتفونى ارقىلى جۇزەگە اسىرادى. الەمدە العاش رەت قاعاز اقشانى قولدانىسقا ەنگىزگەن قىتايلىقتار. ەندى جاھاندا سول قاعاز اقشادان ءبىرىنشى بولىپ باس تارتاتىن دا وسى ەل بولۋى مۇمكىن.

قازىر مۇندا جۇرت جاپپاي ەلەكتروندى تولەم جۇيەسىن پايدالانادى. بەيجىڭدەگى بۇل سۋپەرماركەتكە قالتاڭىزعا اقشا سالىپ كەلمەي- اق ساۋدا- ساتتىق جاساي الاسىز. ول ءۇشىن كاسسانىڭ قىزمەتى ارقىلى QR كودپەن تولەم جاساپ جۇرە بەرەسىز. قازىر ۇلكەن قالانىڭ تۇرعىندارى سۋپەرماركەت پەن بازاردا ساۋدا جاساۋ ءۇشىن ءامياننىڭ ورنىنا سمارفوندارىن الىپ شىعادى. ويتكەنى بارلىق جەردە تەلەفونمەن تولەم جاساۋعا بولادى. بۇل ساتۋشىلار ءۇشىن دە وتە ىڭعايلى. الاياقتىققا، ۇرلىققا جول بەرىلمەيدى. كليەنتكە قايتارىم جاساۋدىڭ دا قاجەتى جوق. بەيجىڭ تۇرعىنى سياو مي ايلىعىن بانكوماتتان شەشىپ المايدى. جالاقى كارتاسى ەلەكتروندى ءاميانىنا بايلانعان، سوندىقتان كەز كەلگەن جەردە تەلەفونمەن تولەم جاسايدى. بۇل جۇيە ءتيىمدى، ۇنەمى جەڭىلدىك جاسايدى.

سياو مي، بەيجىڭ قالاسىنىڭ تۇرعىنى:

- ەلەكتروندى تولەم شىنىمەن ومىرىمىزگە كوپ ىڭعايلى. ونى جالپىلاستىرۋ ءۇشىن شاعىن دۇكەندەردىڭ ءوزى جەڭىلدىك جاسايدى. كەزەك بولمايدى. اقشامدى جوعالتىپ الۋدان دا قورىقپايمىن، بارلىعى سمارتفونىمنىڭ ىشىندە.

 قىتاي الداعى ۋاقىتتا ەلەكتروندى تولەمگە 100  پايىز كوشكەن الەمدەگى العاشقى ەل بولۋى مۇمكىن. مۇندا تاۋارلار مەن قىزمەتتەر ءۇشىن تولەم جاسايتىن ەڭ تانىمال تەلەفون قوسىمشاسى -  WeChat. ونىمەن حابارلاما الماسۋمەن قاتار وپ- وڭاي ەسەپ ايىرىسۋعا دا بولادى. اقشادان قىسىلعان جاقىنىڭا دا قاجەتتى سومانى جىبەرە الاسىز. iResearch كونسالتينگتىك فيرماسى جۇرگىزگەن زەرتتەۋگە سايكەس، 2016 -جىلى قىتايدىڭ بۇل سالاداعى كورسەتكىشى ا ق ش- تان 50 ەسە ارتىپ كەتكەن.

سۋي چجەن، بەيجىڭ تەحنولوگيا جانە بيزنەس ۋنيۆەرسيتەتىنىڭ پروفەسسورى:

- بىلتىر قىتاي تۇرعىندارى تەلەفون ارقىلى 5,5 ميلليارد دوللار تولەمىن جاسادى. ونىڭ باستى ارتىقشىلىعى -  قاۋىپسىز. سونىڭ ارقاسىندا كولەڭكەلى بيزنەس ازايدى. ەڭ باستىسى، وتە ىڭعايلى.

جۇمىسباستى جۇرت ءۇشىن ەلەكتروندى تولەم كوپتەگەن مۇمكىندىكتەر اشتى. ساۋساقتىڭ ۇشىمەن- اق قىرۋار شارۋانى تىندىراتىن بولدىق. قىتايدىڭ قاعاز بەن مونەتا اقشادان بىرتىندەپ قول ءۇزۋى جۇيەلى تۇردە جۇزەگە اسىپ كەلەدى. مەيرامحانادا داياشى كليەنتتەن ءبىرىنشى كەزەكتە WeChat نەمەسە Alipay تولەم جۇيەسىن سۇرايدى. ال مۇنداي مۇمكىندىك بولماسا، قولما- قول ەسەپ ايىرىسۋعا جۇگىنەدى. بۇل ءۇردىس قوعامعا بار- جوعى 3 جىلدىڭ ىشىندە وپ- وڭاي ءسىڭىسىپ كەتتى.

چجي رۋي، بەيجىڭ قالاسىنىڭ تۇرعىنى:

 - قاعاز اقشامەن تولەگەندە قايتقان مايدا تيىندار قولايسىزدىق تۋدىرادى. سوندىقتان تولەمنىڭ باسىم بولىگىن تەلەفون قوسىمشالارى ارقىلى جاسايمىن. كوپ جاعدايدا وزىممەن اقشا الىپ جۇرمەيمىن.

قىتايدىڭ Tencent تەلەكوممۋنيكاتسيالىق كومپانياسى جۇرگىزگەن زەرتتەۋدىڭ ناتيجەسى بويىنشا، قازىر حالىقتىڭ 14 پايىزى قالتاسىنا اقشا سالماي شىعادى. ال ساۋالناماعا قاتىسقانداردىڭ 84 پايىزى ودان مۇلدە باس تارتۋعا دايىن ەكەندەرىن ايتقان.

 اۆتورلارى: نۇربەك بەكەن، جاڭ ءسۇي

www.24.kz