اكەسىنىڭ ۇلىنا جازعان حاتى
ءسىز دە بولاشاقتا اكە بولارسىز. بالالارىڭىزبەن قانداي قارىم قاتىناستا بولارىڭىز بەلگىسىز. سوندىقتان قاپەرىڭىزدە ءجۇرسىن دەگەن نيەتپەن مىنا حاتتى ۇسىنامىز. اكەڭدى مىناداي ويلار مازالاپ وتىر، بالام: مەن كۇنى بويى ساعان تىم قاتال قاراپپىن. تاڭەرتەڭ مەكتەپكە كەتىپ بارا جاتقانىڭدا ورامالمەن بەتىڭدەگى كىردى سۇرتە سالعانىڭ ءۇشىن ۇرىستىم. باتەڭكەڭدى تازالاماپسىڭ دەپ تاعى زەكىدىم. ابايسىزدا زاتتارىڭدى جەرگە ءتۇسىرىپ العاندا شىداماي كەتىپ، ساعان اۋىر سوزدەر ايتىپ جىبەردىم. تاڭعى استى ءىشىپ وتىرعاندا دا ساعان كيلىگەتىن ىلىك تاپتىم. ستاقانداعى شىرىندى توگىپ الدىڭ. تاماقتى قوماعايلانىپ جەدىڭ. شىنتاعىڭدى ۇستەلدىڭ ۇستىنە قويىپ وتىردىڭ. نانعا مايدى تىم قالىڭ عىپ جاقتىڭ. ال تاڭعى پويىزعا مىنگەنىمدە سەن: «ساۋ بول، اكە!» دەپ ايقايلادىڭ، سوندا مەن باسقا ءسوز تاپپاعانداي، قاباعىمدى ءتۇيىپ: «يىعىڭدى تىك ۇستا، قانە!» دەپ جەكىپ قالدىم. كەشكىسىن تاعى سولاي بولدى.
ۇيگە قايتىپ كەلە جاتسام، سەن جولداستارىڭمەن ءاسفالتتىڭ ۇستىندە تىزەرلەپ، شار ويناپ ءجۇر ەكەنسىڭ. شالبارىڭنىڭ تىزەسى قاجالىپ قالىپتى. دوستارىڭنىڭ الدىندا ۇياتقا قالدىراتىنىمدى ويلاماستان مەن سەنى دەرەۋ ۇيگە قۋىپ تىقتىم. «كيىم تەگىن كەلمەيدى - ەگەر ءوزىڭ ساتىپ الساڭ عوي، بايقاپ كيەر ەدىڭ!» . وسى ءسوز اكەنىڭ بالاعا ايتاتىن ءسوزى مە ەدى! ءبىرازدان سوڭ، مەن كىتاپحانادا گازەت وقىپ وتىرعانىمدا سەن كىرىپ كەلدىڭ دە، ماعان كىنالى ادامنىڭ كوزىمەن قاراپ تۇرا قالدىڭ. مەن زەيىنىمدى ساعان اۋداردىم دا، ۇناتپاعان ادامداي قاراپ: «نە كەرەك؟ » دەپ بۇرق ەتتىم. سەن ەشتەڭە دەگەن جوقسىڭ. جۇگىرىپ كەلدىڭ دە، موينىمنان قۇشاقتاپ، بەتىمنەن ءسۇيىپ الدىڭ. موينىمنان قۇشاقتاعانىڭدا ماعان دەگەن ماحابباتىڭدى سەزدىم. ول ماحابباتتى جاراتۋشى يەمنىڭ ءوزى جۇرەگىڭە ورنالاستىرعانداي ەدى. جانە ول ماحاببات مەنىڭ قاتالدىعىما قاراماستان ەش باسەڭسىمەگەن ەكەن. سودان سوڭ سەن ەسىككە بەتتەدىڭ. تىپىرلاپ، جوعارعى قاباتقا شىعىپ بارا جاتقانىڭ ەستىلىپ تۇردى.
بىرنەشە مينۋت وتكەننەن كەيىن قولىمداعى گازەت سۋسىپ ءتۇسىپ كەتتى. بويىمدى قورقىنىش كەرنەدى. قۇدايىم- اۋ، دەپ ويلادىم، مەنىكى نە ادەت وسى؟ كيلىگۋ، ۇرسىپ تاستاۋ - ساعان كۇندە ىستەيتىنىم وسى. سونداعى سەنىڭ بار كىناڭ - بالا بولعانىڭ عانا. مەن سەنى جاقسى كورمەيمىن دەۋگە كەلمەيدى؛ دۇرىسىراعى، مەن سەنەن تىم كوپ نارسە كۇتەتىن سياقتىمىن. ءبىراق سەن ءالى كىشكەنتايسىڭ. مەن ساعان وزىمە قوياتىن تالاپتاردى قويىپ، ءوزىمنىڭ جاسىمداعى ادامنىڭ تۇسىنىگەمەن قارايدى ەكەنمىن. اسىلىندە، سەنىڭ ارەكەتتەرىڭ مەيىرىمگە تولى ءارى شىنايى دا. سەنىڭ جۇدىرىقتاي جۇرەگىڭ وتە ۇلكەن بولۋى مۇمكىن - ول بيىك- بيىك قۇزداردان دا اسىپ، كوتەرىلەتىن كۇن سەكىلدى. جاڭا جۇگىرىپ كەلىپ، ماعان قايىرلى ءتۇن تىلەپ، بەتىمنەن سۇيگەنىڭدە مەن سونى ءتۇسىندىم. سەنىڭ بۇل ارەكەتىڭ وعاش، ءتىپتى ەرسى سەكىلدى، قالاي ىستەگىڭ كەلسە، سولاي ىستەدىڭ. ءبىراق سونىڭ ءوزى جاقسى. باسقاسىنىڭ ءبارى بۇنىڭمەن سالىستىرعاندا تۇككە تاتىمايدى. مىنە، ەندى مەن كەرەۋەتتە ۇيىقتاپ جاتقان جەرىڭە كەلىپ، تىزەرلەپ، ۇياتتان ورتەنىپ وتىرمىن! ارينە، بۇل وتىرىسىم مەنىڭ بار كىنامدى جۋىپ- شايا المايدى. ونىڭ ۇستىنە ەرتەڭ سەن ويانعاندا وسى ويلارىمنىڭ ءبارىن ايتسام، سەن ءبارىبىر تۇسىنبەيسىڭ. الايدا مەن ەرتەڭ ناعىز اكە بولىپ وتىرام! مەن ساعان دوس بولامىن، سەنىڭ ۋايىمىڭ مەنىڭ ۋايىمىم، سەنىڭ قۋانىشىڭ مەنىڭ قۋانىشىم بولادى. ءتىپتى ساعان قاتقىل ءبىر ءسوز ايتقىم كەپ كەتسە دە، ءتىلىمدى تىستەي قويۋعا ادەتتەنەمىن.
«ول ءالى بالا عوي - كىشكەنتاي عانا بالا» دەپ دۇعانى قايتالاعانداي ىشىمنەن قايتالاپ جۇرەمىن. وسىعان دەيىن مەن ساعان بالاعا قاراعانداي ەمەس، ۇلكەن ادامعا قاراعانداي قاراپ كەلىپپىن. ءبىراق قازىر سەنىڭ ءبىر ۋىس بوپ جاتقان جاتىسىڭدى كورىپ، سەنىڭ ءالى دە بالدىرعان ەكەنىڭدى ابدەن ءتۇسىنىپ وتىرمىن. كەشە عانا اناڭنىڭ يىعىنا باسىڭدى قويىپ، كەۋدەسىندە تىنىش تاۋىپ جاتاتىن بوبەك ەدىڭ عوي. مەن سەنەن تىم كوپ نارسە تالاپ ەتىپپىن...
ۋيليام ليۆينگستون لارنەد
Massaget.kz
