قازاقستاندىق تاۋارلارعا قىتاي تاراپىنان سۇرانىس جوعارى

استانا. قازاقپارات -  Kazakh Invest ۇلتتىق كومپانياسى وتاندىق وندىرۋشىلەرگە ەكسپورت بويىنشا تەگىن ترەنينگتەر وتكىزىپ جاتىر.

شارانىڭ باستى ماقساتى -  قىتاي نارىعىنا شىعۋ جانە كەلىسسوزدەر جۇرگىزۋ ماسەلەسىن تالقىلاۋ، قازاقستاندىق كاسىپورىندار مەن اسپاناستى ەلىنىڭ قۇزىلى ورگاندارى اراسىندا ديالوگ الاڭىن قۇرۋ.

ايتا كەتكەن ءجون، بۇگىندە قازاقستاندىق كاسىپكەرلەر كورشى ەلگە قوي ەتى، بال، استىق جانە سويا جەتكىزۋگە رۇقسات العان. ەندى سيىر ەتى مەن وسىمدىك مايىن، ءسۇت پەن ماكارون ونىمدەرىن تاسىمالداۋ ماسەلەسى قاراستىرىلىپ جاتىر.

 Kazakh Invest وكىلدەرىنىڭ ايتۋىنشا، قىتاي تاراپىنان قازاقستاندىق تاۋارلارعا دەگەن سۇرانىس جوعارى. ويتكەنى شەتەلدىكتەر ورگانيكالىق تازا ونىمدەردى كوپتەپ تۇتىنا باستاعان.

 مەيىرجان مايكەنوۆ، Kazakh Invest ۇ ك ا ق باسقارما ءتوراعاسىنىڭ ورىنباسارى:

 - ەكسپورتتالاتىن ونىمدەرگە ناقتى تالاپتار قويىلادى. ەڭ الدىمەن قىتاي تارابى وسىندا كەلىپ، ءوندىرىستى ءوز كوزىمەن كورىپ قايتادى. ەگەر ول ستاندارتتارعا ساي كەلسە، كومپانيانىڭ قىتايلىق رەەسترگە كىرۋى ابدەن مۇمكىن. الايدا وعان ەنگەننىڭ وزىندە دە ءوندىرىس كولەمى بويىنشا تالاپتار قويىلادى. وعان بارلىعى بىردەي ساي كەلە بەرمەيدى. سوندىقتان قازىر ۇساق پارتيالاردى قىتايعا جەتكىزۋ بويىنشا كەلىسسوزدەر جۇرگىزىپ جاتىرمىز.

ءانۋار شوجەعۇلوۆ، ق ر ي د م ەكسپورتتى دامىتۋ جانە ىلگەرىلەتۋ دەپارتامەنتىنىڭ ديرەكتورى:

- قىتاي نارىعىنىڭ اۋقىمدى ەكەنى ءمالىم. وندا الەمنىڭ بارلىق ەلدەرىنەن تاۋارلار جەتكىزىلەدى دەسە دە بولادى. الايدا سوڭعى ۋاقىتتا كورشى مەملەكەتتە گەنەتيكالىق موديفيكاتسيالانعان ونىمدەردى قولدانۋ جاعدايلارى جيىلەپ كەتكەن. ال ءبىزدىڭ ونىمدەر ورگانيكالىق جاعىنان قاجەتتى تالاپتاردىڭ بارىنە ساي كەلەدى.

www.24.kz