ەرلان قوشانوۆ ستۋدەنتتەرگە اكىم ءۇشىن باقىتتىڭ نە ەكەنىن ايتتى

استانا. قازاقپارات - قاراعاندى وبلىسىنىڭ اكىمى ەرلان قوشانوۆ «جاستار ءداستۇرلى قۇندىلىقتار ءۇشىن» فورۋمىنىڭ قاتىسۋشىلارىمەن كەزدەستى، دەپ حابارلايدى ءوڭىر باسشىسىنىڭ رەسمي سايتى.

جاستاردىڭ سۇراقتارىنا جاۋاپ بەرە كەلە، ايماق باسشىسى ءوزى تۋرالى، ول ءۇشىن باقىت دەگەن نە ەكەنىن جانە دە قاراعاندىدا جاڭا بالالار مەن جاس وسپىرىمدەر سارايى قاشان پايدا بولاتىنىن ايتتى.

- وسىنداي كەزدەسۋلەرگە قۋانا كەلەمىن، اسىرەسە جاستار اۋديتورياسىنا. مۇندا ەڭ شىنايى ءارى تىكەلەي بايلانىس ورنايدى. قاراعاندى وبلىسى - ەلىمىزدىڭ ەڭ جاس جانە ۋربانيزاتسيالانعان ايماعى، - دەدى ەرلان قوشانوۆ فورۋمنىڭ اشىلۋىندا.

شارانىڭ باستى ماقساتى جاستار بويىندا ءداستۇرلى قۇندىلىقتاردى، قازاقستاندىق پاتريوتيزمنىڭ جاڭاشا ۇستانىمدارىن جانە دە حالقىمىزعا ءتان ءدىني سانا-سەزىمدى قالىپتاستىرۋ، سونداي-اق پراگماتيزم مەن كريتيكالىق ويلاۋ داعدىلارىمەن بايلانىستى سۇراقتاردى تالقىلاۋ بولدى.

فورۋمعا قاتىسۋشىلارمەن كەزدەسۋگە ق ر ءدىن ىستەرى جانە ازاماتتىق قوعام مينيسترلىگىنىڭ ۆيتسە-ءمينيسترى ابزال نۇكەنوۆ، تۇڭعىش عارىشكەر توقتار اۋباكىروۆ، «نۇر-مۇباراك» يسلام مادەنيەتى ۋنيۆەرسيتەتىنىڭ رەكتورى جۋدا باسيۋني جانە قازاقستان م م ا فەدەراتسياسىنىڭ پرەزيدەنتى اناتولي كيم كەلدى.

جاستار سپيكەرلەرگە وزدەرىن قىزىقتىرعان سۇراقتاردى قويدى. مىسالعا ەربولات ەسىمدى ستۋدەنت اكىمنەن ءسىز ءۇشىن باقىت دەگەن نە دەپ سۇرادى؟

- ءسىز قانداي باقىتتى ايتاسىز - اكىمنىڭ باقىتى ما، الدە جەكە مە؟ - دەپ كۇلدى ەرلان قوشانوۆ.

- ەگەر اكىمنىڭ باقىتى جايلى ايتار بولسام، وندا ول ايماق تۇرعىندارىنىڭ باقىتى دەر ەدىم. ايماقتا كومىر، جىلۋ، سۋ بار بولسا، قوعامدىق كولىك ۋاقتىلى ءجۇرىپ- تۇرسا - مەن ءۇشىن بۇل ۇلكەن باقىت بولار ەدى. جانە دە، باستىسى تۇرعىندار ماعان ۇرىسپاسا. ال جەكە باقىتقا كەلەر بولساق، ول - مەنىڭ وتباسىم. قىزدارىمنىڭ باقىتى، وتباسىمنىڭ باقىتى - مەن ءۇشىن ماڭىزدىسى وسى.

جاستاردى قىزىقتىرعان تاعى ءبىر ساۋال ول قاراعاندىدا جاستار سارايىنىڭ قۇرىلىسى. وبلىس اكىمىنىڭ سوزىنشە، ول جوسپاردا بار.

- قالامىزعا كوپتەگەن نارسەلەر قاجەت. بىزگە ۇلكەن كونسەرت زالى، ۇلكەن مونشا جانە شىعارماشىلىق ءۇي قاجەت. مۇنىڭ بارلىعى جوسپاردا بار، الايدا ولاردى ىسكە اسىرۋ ءۇشىن ۋاقىت كەرەك. كەلەسى جىلدان باستاپ ءبىز ەكى نىسان قۇرىلىسىن قولعا الامىز.

ولار 1250 ورىندىق ۇلكەن كونسەرت زالى مەن بالالار مەن جاس وسپىرىمدەر سارايى، وندا قالاداعى ەڭ ۇلكەن 50 مەترلىك باسسەين بولادى. ال داريا ەسىمدى قىز اكىمنەن قاراعاندى ايماعى تۋرالى العاشقى كوزقاراسى تۋرالى سۇرادى.

- كوزقاراسىم جاقسى، ءبىراق ونى العاشقى دەپ ايتۋعا كەلمەس. مەن ءوز تۋعان جەرىمە جۇمىس ىستەۋگە كەلدىم. بۇعان دەيىن دە مەن اپتا سايىن قاراعاندىدا بولاتىنمىن. مەن وسىندا، قاراعاندى وبلىسىندا تۋىپ، ءوستىم، كوپ جىلدار بويى جەزقازعاندا جۇمىس ىستەدىم. سول سەبەپتى مۇنى العاشقى كوزقاراس دەپ اتاۋعا كەلمەيتىن شىعار، سەبەبى مەن ءوز ۇيىمە كەلدىم، - دەپ جاۋاپ بەردى ەرلان قوشانوۆ.

جاستار فورۋمى قاراعاندىدا وسىمەن ەكىنشى رەت وتكىزىلىپ وتىر. بيىل فورۋم اياسىندا سەمينار- ترەنينگتەر، قاراعاندى قالاسىنىڭ جوعارى وقۋ ورىندارىنىڭ ستۋدەنتتەرىمەن سپيكەرلەردىڭ كەزدەسۋى، وبلىستىق ولكەتانۋ مۋزەيىنە ەكسكۋرسيا، وبلىس اكىمى كۋبوگى ءۇشىن جايدارمان فەستيۆالى، قازداۋىستى قازىبەك ءبيدىڭ قىزمەتى مەن شىعارماشىلىعى ارنالعان عىلىمي-پراكتيكالىق كونفەرەنسيا، «قازىبەك ءبي» سپەكتاكلىنىڭ كورسەتىلىمى، «TEDx QARAGHANDY»  كلۋبىنىڭ اشىلۋى وتەدى.

قاراعاندى وبلىسىندا ءاربىر ءتورتىنشى تۇرعىنى - ول 14 پەن 29 جاس ارالىعىنداعى جاستار. جانە دە جاستاردىڭ 80 پايىزعا جۋىعى قالالاردا تۇرادى.