اۋىزدىڭ جاعىمسىز يىسىنەن قالاي ارىلۋعا بولادى؟
مۇنداي قيىندىققا تاپ بولعاندار بۇل پروبلەمانى ءتۇرلى ءتىس پاستالارىمەن، اۋىز قۋىسىنا ارنالعان سپرەيلەردىڭ، ساعىزدىڭ كومەگىمەن شەشۋگە تىرىسادى. بۇل دۇرىس شەشىم بە؟ اۋىزداعى جاعىمسىز يىستەن قالاي ارىلۋعا بولادى؟ ونىڭ شىعۋ سەبەپتەرى قانداي؟
جاعىمسىز ءيىستىڭ شىعۋ سەبەبىنىڭ 70 پايىزى ادامنىڭ ىشكى اعزالارىنىڭ اۋرۋلارىمەن بايلانىستى بولسا، 30 پايىزى اۋىز قۋىسى، ءتىس اۋرۋلارىمەن (تىسجەگى، قىزىل يەكتىڭ قابىنۋى ت. ب) بايلانىستى. سوندىقتان ەگەر اۋزىڭىزدان جاعىمسىز ءيىس بايقاساڭىز، ەڭ الدىمەن تەراپيەۆت- دارىگەرگە جۇگىنگەن ءجون.
دارىگەرلەر جاعىمسىز ءيىستىڭ شىعۋ سەبەپتەرى وتە كوپ ەكەندىگىن ايتادى. سولاردىڭ باستىلارىنا توقتالساق:
- (كوبىنەسە ايەلدەردە) قالقانشا بەزى اۋرۋلارى؛
- گورمونالدى بۇزىلىستار؛
- جۇتقىنشاق، كومەي، مۇرىن قۋىسى اۋرۋلارى؛
- وكپەنىڭ قابىنۋى؛
- اسقازاننىڭ ويىق جاراسى؛
- باۋىر جەتىسپەۋشىلىگى، جۇمىس ىستەمەۋى نەمەسە ناشارلاۋى؛
- ءوتتىڭ قابىنۋى؛
- توق ىشەك ىسىگىنىڭ پايدا بولۋى
- كۇيزەلىسكە ۇشىراعاندا
- قانت ديابەتى اۋرۋى كەزىندە اۋىزدان اتسەتون ءيىسى شىعادى
- انەميا (قانازدىق)
- لەيكوز (اق قان) ت. ب.
ال جاعىمسىز ءيىستىڭ بار-جوعىن قالاي بىلۋگە بولادى؟
قاسىقتىڭ دوڭەس تۇسىن تىلگە قويىپ، 5-10 سەكۋند ۇستاپ، قاسىقتاعى ءيىستى بايقاۋ.
ءتىس تازالاۋعا ارنالعان ءجىپتىڭ كومەگىمەن.
ەندى دارىگەرگە بارعانعا دەيىن، جاعىمسىز ءيىستىڭ ناقتى سەبەبى انىقتالعانعا دەيىن ءسىز نە ىستەي الاسىز؟ جاعىمسىز ءيىستى بولدىرماۋ ءۇشىن نە ىستەۋ كەرەك؟
1. اۋىز قۋىسى گيگيەناسىن ساقتاۋ.
2. ءتىستى كۇنىنە كەم دەگەندە 2 رەت 2 مينۋتتان كەم ەمەس ۋاقىت تازالاۋ.
3. ءاربىر تاماقتانعاننان سوڭ اۋىز قۋىسىن ارنايى سۇيىقتىقتارمەن شايۋ.
4. ءتىس تازالاعاندا مىندەتتى تۇردە ءتىلدى دە قوسا تازالاۋ.
5. ءتىستى تولىقتاي تازالاۋ ءۇشىن ءتىس ءجىبىن پايدالانعان دۇرىس.
ەگەر ستوماتولوگ دارىگەردىڭ قابىلداۋىندا بولىپ، ءتىس اۋرۋلارىن جويىپ، گيگيەنانى ساقتاپ جۇرسەڭىز دە جاعىمسىز ءيىس شىقسا، تەراپيەۆتكە جۇگىنىڭىز. جاعىمسىز ءيىستىڭ سەبەبى ىشكى قۇرىلىسىڭىزدا جاتىر دەگەن ءسوز.
دەرككوز: http://www.jastar.kz
